نصائح ذهبية لحياة زوجية سعيدة

لما بنتخيل العلاقة المثالية، بنتخيل علاقة كلها انسجام وتناغم، كل طرف فاهم الطرف التاني، ومش محتاج يعبر عن احتياجه.

وطبعًا ما هذا إلا تصور حالم   

لو نزلنا لأرض الواقع، هنلاقي إن آه في علاقات شبه مثالية، لكن العلاقات دي اكتر علاقات الطرفين بيعبروا فيها عن نفسهم وعن احتياجاتهم، والمشاعر السلبية اللي بيمروا بيها.

وده ناتج عن رغبة عميقة في إن العلاقة تنجح، الطرفين بيحاولوا، ومدركين إنهم شخثين مختلفين، ليهم آراء مختلفة، وبالتأكيد لازم يكون في نقاشات ويمكن خلافات كمان عشان يقدروا يخلوا العلاقة أنضج.

أبحاث كتير أثبت إن قدر ما من الخلافات والمشاكل في العلاقة أمر صحي، ومطلوب تمامًا. وده مش معناه إننا نهين بعض، لإن الاحترام أهم عامل بينجح أي علاقة بين زوجين أو حتى أي تعامل.

في عدة نقاط لو أخدنا بالنا منها، هنجني خيرات الخناقة، وهنطلع بأقل قدر ممكن من الخسائر، ركزي معايا يا ست الكل:

1)  أوعي تغلطي فيه اثناء ما بتتخانقوا، الشتائم والتطاول ممنوع.

​

2)  ممنوع تشخصني الأمر، وتقولي طول عمرك شخص مهمل، عارفة ال طفل ال صغير لما قلنا ننتقد سلوكه ونساعده يعدله وما ننتقدش شخصه؟ هو نفس الأسلوب المتبع مع العيل الصغير كده.

3) على ذكر العيال الصغيرة، اتكلمنا عن أول أداة في التربية الإيجابية وهي تعريف المشاعر، لو ما قرأتيش سلسلة التربية الإيجابية اقرأيها هتفيدك، المهم هي نفس الأداة نستخدمها مع الزوج لو غضبان وبيلومك، قوليله حاسه بيك مقدرة إنك متضايق فعلًا موقف يضايق، التعاطف ده وإنك تديله مساحة يخرج شعوره وتصدقي عليه، أفيد ساعات من إنك توجدي حل، مع إننا هنوجده إن شاء الله.

4)  لوأنت اللي متضايقة وعايزة تبدأي خناقة، تعملي إيه؟ 

أول حاجة هتختاري وقت مناسب، وتستأذني إنكوا تفتحوا نقاش بهدوء، واتكلمي عن اللي مضايقك من غير لوم وتجريح، لكن بطريقة إنك أفضل زوج في الدنيا، وكذا بيتعبتي، الولاد وشغل البيت، لو بس تقدر تساعدني زيادة شويه، كعادتك أنت بتعرف تخفف عني، ياريت تشي هدومك مكانها.

ومفيش مشكلة تعيطي لو ده هيريحك، وتخرجي كل اللي جواكي. بس بأدب ها من غير ما تضربي.

5)  الغرض من الخناقة او النقاش، إننا نقرب وجهات النظر، ونحاول نقف في أرضية مشتركة، مع الاعتراف بإننا شخصين، وأفكارنا مختلفة أكيد، ده لا يعني إن شخصياتنا هتتلاشى.

6)  الخناقة اللي بتنتهي بوعود ومفيش حل، تبقى جهد وتعب راح على الفاضي، هو ما راحش اوي، لإن تعبيركم عن احتياجاتكم صحي، لكن هيفضل الأمر عرضة للتكرار، وتتخانقوا لنفس السبب بدل ما تتخانقوا لأسباب تانية. حاولوا أخر القعدة، بعد كا كل حد طلع اللي جواه، تلاقوا توصيف كامل للمشكلة، وحلول انتوا الاتنين تلتزموا بيها، وكل حد فيكوا مفيش مانع يتنازل شويه، لكن المهم يبقى في محاولة عشان تكون العلاقة دي أفضل.