:: هُس هُس :: - منتديات غزل وحنين

:: هُس هُس :: - منتديات غزل وحنين

 
:: هُس هُس ::

---

هُس هُس

أوعى تفتح "خشمك" أوعى تبص ..

أوعى ترمش أو تكشّر أو تكش ..

أوعى أشوف فـ عنيك حيرة أو تسائل ..

أوعى تنفخ أو تفش ..

أوعى تسأل أو تجاوب أو تهش أو تنش ..

هُس هُس

أي تعليق منك إهانة ..

جنحة وسجن وخيانة ..

مسموح لك بس ترقص وتتنطط ..

وكل حاجة تستّف وتظبّط ..

هُس هُس

"متخدش" الحكاية قفش ..

مفهاش لعب أوغش ..

ما طول عمره "البيه" "بيأُش"! ..

إيه الجديد ؟..

"بلا وش" ..

فيها إيه لمّا نسي "يجدم" فـ المعاد"ورجات" ..

نُلطم أحنا "بجه" "ونشج" "خلجات" ؟..

"خبر إيه "يا بلديات .. !

منه لله واللي فات مات ..

"عجولّك" خطأ فـ الاجراءات ..

"تجولّي" اشمعنا " الفتّوات" .. !

وشفهمك أنت فـ شغل "البهوات " ؟..

"كفياك عاد " "تجرب" مني " الجوالح" ..

و"تجلّب" الجمر الكيل زايد وطافح ..

كلامك "يعور الراس" و"كيف" البرد لافح ..

هُس هُس

الكلام لا هيودي ولا يجيب ..

"عز"هيرجع "عز" ..

و"نجيب" هيفضل "نجيب" ..

"تيجي" أنت علـ الآخر و"تخيب" ؟ ..

وتقول كلام "ماسخ" ..

"يجلب" "المعدول" ويعدل "المجلوب" ..

"كفياك عاد" "مشناوي" تتوب ..

ياولدي هي كده "الغلبان" "غلبان" ..

والمغلوب مغلوب ..

لا نافع فيها "شوم" ولا حجارة ولا طوب ..

"اعجل" يا ولدي المكتوب مكتوب ..

و"بلاها" "حديت" "كيف" الُرمح في العصب "شارخ" ..

وإلا اشتهيت العيش والحلاوة ؟..

ماله "المش" و "الرامخ" ! ..

"طب" شامخ شامخ ..

غصباً عنك وعن السامعين ..

هتروح وين ؟ ..

هُس هُس