7 حيل مكياج لاخفاء علامات الشيخوخة

اكيد المكياج في اوقات كتير بيكون حل ولو مؤقت لبعض عيوب البشرة عشان نخفيها ونظهر بلوك حلو ومثالي, واحنا النهاردة جايبين لكل بنات 7 حيل مكياج لاخفاء علامات الشيخوخة والتجاعيد والخطوط الرفيعة في البشرة وتخليكي تباني اصغر.

1- املي الحواجب:

املي الحواجب بشكل كويس وخليها سميكة لان الحواجب الرفيعة بتظهر العين بشكل مجهد وبتبان انها تعبانة, املي فراغات الحواجب ببودر الحواجب وحددي من فوق وتحت الحاجب بالكونسيلر عشان تظهري شكلهم اكتر وتحدديهم.

2- استخدمي طبقة خفيفة من البودرة:

البودرة الكتير على البشرة مش بتداري العيوب لكن ممكن تظهرها اكتر لانها بتدخل جوه خطوط البشرة وبتظهر العيوب اكتر عشان كده الافضل انك تحطي طبقة خفيفة من البودرة, وممكن بدل البودرة تكتفي بكريم اساس خفيف على البشرة.

3- سلطي الضوء على الزوايا الداخلية للعين:

تسليط الضوء على الزوايا الداخلية للعين بيلفت النظر بعيد عن الخطوط والتجاعيد حوالين العين وفي نفس الوقت بتدي لوك حلو جدا للعين, طبقي الهايلايت عند الزوايا الداخلية للعين, وعضمة الحاجب.

4- استخدمي كمية مناسبة من الكونسيلر:

الكونسيلر من الحاجات الهايلة جدا لاخفاء الهالات والخطوط حوالين العين لكن المبالغة فيه ممكن تعمل نتيجة عكسية وتظهر الخطوط والعيوب اكتر , عشان كده الافضل انك تحطي كمية بسيطة وتمزجيها كويس حوالين العين.

5- استخدمي ليب جلوس:

الليب جلوس من الحاجات اللي ممكن تساعدك تظهري بشكل اصغر وهتديكي شكل ممتليء للشفايف, ممكن تستخدمي ليب جلوس باللون الخوخي او الوردي.

6- احمي رقبتك:

الرقبة من الاماكن اللي بيظهر فيها علامات السن بشكل واضح, ممكن تستخدمي كريم اساس مناسب للون بشرتك يساعدك تخفي التجاعيد والتصبغات والبقع اللي بتظهر مع السن, وممكن كمان تستخدمي برونزر هيديكي لوك دافيء حلو اوي, ومتنسيش الصن بلوك قبل تطبيق كريم الاساس.

7- متنسيش البلاشر “احمر الخدود”:

البلاشر او احمر الخدود من الخطوات المهمة جدا اللي بتدي حياة للمكياج وبتظهره, حطي بفرشة البلاشر على عضمتين الخد لحد منابت الشعر.