“كبار السن” محتاجين إيه؟ وإزاي تتعامل معاهم؟ وتاخد بالك من إيه؟
مرحلة “كبار السن” معظمنا هيوصلها أو هيعدي بيها مع مرور الوقت والمرحلة دي ليها حاجات خاصة بنتعامل معاها سواء إحنا بنفسنا أو بنتعامل مع ناس بتمر بيها في حياتنا.. كبار السن دول هم الحكمة وملوك التجربة اللي مروا بحاجات كتير أوي وبنحتاج نصايحهم وآرائهم ولكن في نفس الوقت بيحتاجوا مننا اهتمام وطريقة تعامل معينة تكون مفيدة ومريحة ليهم ونقدرهم بشكل ما.. فا تعالوا نشوف إزاي ممكن نحقق ده؟
حسب مجلة psychologytoday وموقع webmd
محتاجين إيه؟
في الأول لازم نكون عارفين الدعم اللي بنقدمه أو المساعدات حتى البسيطة ممكن تحميهم من مشاكل وأمراض وحاجات كتير لو حصلت هيبقى صعب التعامل معاها بعدين.. ودول حاجات ممكن تساعدهم بيها:
1- العناية الشخصية:
ودي تقدم أبسط الحاجات في النشاطات اليومية زي الأكل والعناية الشخصية ولبس الهدوم والحركة.. كلها حاجات بسيطة لكن تأثيرها مفيد جدًا
2- التغذية:
مش سهل عليهم يتحركوا ويشتروا حاجتهم بنفسهم فا ممكن تساعد في النقطة دي.. كمان تنظيم أكلهم والحاجات الصحية مش بياخدوا بالهم منها أوي وهنا دورك بإنك تكون Reminder وشوية تنظيم لأنهم ممكن يفوتوا وجبات عادي بكل بساطة
3- لو في أدوية:
أغلب كبار السن ليهم أدوية مستمرة بشكل يومي.. تنظيم الأدوية في مواعيدها له دور مهم سواء عشان بينسوا المواعيد أو الجرعة بالظبط فا لو تقدر تحاول تنظم الأدوية معاهم
وفي شوية حاجات إضافية زي الحركة بشكل عام سواء في البيت أو برا تساعدهم فيها عشان يتجنبوا المشاكل والإصابات.. كمان إدارة الفلوس أو المساعدة في الأمور المادية مهم لأنهم ساعات مش بيراعوا تقييم الوضع المالي وساعات ممكن يتنصب عليهم وهكذا فالنقطة دي محتاجة رعاية سواء حد من العيلة أو قريب منها وموثوق فيه.. كمان السلامة والأمان لأنهم أكتر ناس معرضة للحوادث ومش بياخدوا احتياطاتهم بشكل صحيح أو مش بياخدوا احتياطاتهم أصلا
إزاي تتعامل معاهم؟
في الأول إنت محتاج تبقى صبور وهادي عشان تقدر تتعامل صح لأنك هتقابل شوية صعوبات وبطء في التعامل والتفاعل ولازم تراعي إن الشخص اللي قدامك دي مقدرته.. كمان فيه أوقات هتلاقي نسيان وإحباط منهم وكام حاجة سلبية فا حط نفسك مكانه وهتتفهم الموضوع ولو حسيت إنك جيبت آخرك وتعبت ممكن تريح شوية وتحاول تاني
حسسه بالاحترام والاهتمام في طريقة تعاملك معاه بإنك ماتخليش الموضوع أوامر أو تعليمات.. يعني ممكن تقوله “إيه رأيك تاكل كذا؟” أو “تحب تاكل كذا؟” وبلاش تستخدم “لازم تاخد الدوا” ممكن تستخدم أسلوب “مهم تاخد الدوا” أو “خلينا نعمل كذا كذا” وتحسسه بالمشاركة كده وساعتها هتلاقي الدنيا أحسن
شوية حاجات تاخد بالك منها
تحاول تكون واعي بالتغيرات النفسية لأن في الغالب هتلاقيهم بيعانوا من تغيرات مزاجية أو مثلًا العزلة بتأثر عليهم فا التعامل مع النقطة دي يكون بحساسية شوية وباهتمام
الذاكرة بتقل مع مرور الوقت ولما تكبر في السن بتتأثر بشكل كبير لكن فيه شوية نشاطات ذهنية أو حتى ترفيهية زي الألعاب بتساعد في الحفاظ على الذاكرة والتركيز
الوحدة صعبة أو الانعزال فا المحاولة إنك توفر تفاعل اجتماعي بأشكال مختلفة زي إنك تعمل ده بنفسك أو تساعد بحد قريب من العيلة أو صديق قديم له توصلهم ببعض أو حتى الجيران لو فيهم حد متاح لده.. لأن مواجهة العزلة بيكون ليها نتايج صعبة
خد بالك من التواصل.. خليه أبسط لغة ممكنة عشان تتأكد إنه فهمك ويقدر يرد عليك ويوصلك المعلومة اللي محتاجها أو المساعدة والطلب اللي عايزهم وتديله وقته يرد عليك عشان المعلومة توصلك صح
في النهاية، كلنا في حياتنا، ناس كبيرة في السن وبنتعامل معاهم سواء بشكل مباشر أو لأ وأغلبنا هيكبر ويوصل للمرحلة دي وساعتها هنحتاج نفس المساعدة وده بييجي بالمجهود اللي بتعمله عشان تفهم الناس وتفهم إنت كمان إزاي تتعامل مع الموضوع.. وماتنساش لو احتاجت استشارة، إنك تشوف حد مختص يساعدك في تقديم النصيحة والطريقة الصح في التعامل
ليست هناك تعليقات:
إرسال تعليق