::أكتب دستورك :: - ديوان غزل وحنين الادبى

::أكتب دستورك :: - ديوان غزل وحنين الادبى

::أكتب دستورك ::

أكتب دستورك

قالولي أكتب دستورك ..

أنا قولت مشكاتب !..

اكتب أيه؟ ..

ويروح فين المكتوب من الكاتب ..

ياعم أكتب دستورك ..

فرصة تاخد دورك..

ترسم عبورك بأيدك

والسكة أهي قدامك ..

أكتب حقوقك أحلامك..

سمّع صوتك وكلامك ..

على الراس مسموع .

ليك حق تاخده ..

ومتنساش عليك واجب ..

مش ميغا هيا وسيبين الحبل..

عل الغارب !..

أنا قولت أيوه هي دي "الفوله"

جا اليوم اللي أشارك ..

فيه أمنا الغولة ..

ياناس شبعنا كدب ..

بأه دي معقولة..

أكلت أيه أنا عشان ..

أشرب عليه ميه..

سنتين تلاته والفرحة ..

مستنيه تكمل متكملشي ..

واقفة بعيد دبلانة ومكسوفة ..

تكمل أيمتى ..

وكل شوية مخطوفة ! ..

كتبنا كم دستور وحفظنا مضمونه..

وبصمنا بالعشرة نحميه ونصونه..

وحلفنا يمين تلاته نحترمه وما نخونه..

هما يومين تلاته ويتنصبلو كمين..

يتقطع بالتلاته ويدّفن في الطين..

ونصوم تلاته كفارة يمين!

وبعد دا كله تقولي شارك ..

وحاسب..

وأكتب دستورك ..

انا فقيه دستوري ..

ودا دوري ومشكاتب ..

يمين تلاته ما انا كاتب.