مسحراتي الشريف الهمامي
مسحراتي الشريف الهمامي
مسحراتي غرام
أصحصح قلوب نايمين
ادقدق علي الأبواب
اللي الصيام ناويين
اغني كلامي مديح
واقول صلاة ع الزين
موال بشوق اكتبه
واحكيه لناس عاشقين
قالي الكبير يا شريف
هات م الحروف حلويين
واطلع ف نص الليل
دندن علي السامعين
مسحراتي أصيل
هتجنن التانيين
واستني اخر الشهر
نفحة من الغاليين
واحفظ لصاحب الفضل
حسنة تزيد تسعين
اصحي يا نايم فوق
ربك كريم وحنين
اصحي يا نايم ...رمضآن كريم
أحبائي غزل وحنين
كلُ عام وانتم في رحمة ومغفرة وعتقٌ من النار
وحضرتك بخير وسعاده يارب
ردحذفيامسحراتى ياهمام ياترى حنسمع طبلتك كل يوم
ولا اليوم فقط بنقكرنا بطلتك وبكلماتك الجميله التى تددن بها على طبلتك
اهل غزل وحنين طماعين ومنتظرينك يوميا مع مسحراتى الغرام
تدبيسه ياباشا وانت حر
21-06-2015
الشريف الهمامى
ردحذفمسحراتي مغنواتي
وبدق في الحارات
شاعر وواعر راضي وصابر
موال بقوله واكتبها ربعيات
ناس كانوا
قبلي قالوا في الأمثال
الرجل تدب مطرح ما تحب
اصحي يا نايم
تاخود سحورك
وترد صايم
جهز فطورك
والرزق كله حلو منه حلال
عمي اللفندي مقداره عندي
راجل وم الأبطآل
حارب حروبها
خرم دروبها
سمعني منه وحكالي عنه
حواديت كتيرة
اعمال كبيرة
متكفهاش صفحات
يا عم رمزي
يا نخلة هزي
فطرني وزي
البط مش بطال
اكتب حروفك
خليني اشوفك
جوه القصيدة
حلوة وجديدة
اصحي يا نايم واسمع كلام يتقال
رمضآآآن كريم
الأخت الفاضلة السيدة / نشوي
كل الشكر لكم أختي استحسانكم للموضوع
وانه لقليل من فيض عطاياكم آل غزل وحنين
لأن أحيانا الله سأتي كل ليلة
كل عام وأنتم إلي الله أحبُ وأقرب
تحياتي
22-06-2015
مسحراتى مغناوتى وبينادى
ردحذفف كل حى و وادى
رمضان أتانا السنادى
بصُحبة دايماً جميلة
الصُحبة فيها أحِبَّة
وكل يوم بتزيد المحبَّة
وعلى طبلتك متجمعين كُل ليلة
22-6-2015
الشريف الهمامى
ردحذفمسحراتي بربابة
طبلة زمانها وراح
علي كل باب غنيت
في ارض الكريم سواح
أصلي ومانيش تقليد
سيدنا النبي مداح
صلوا عليه وسلموا
الراحة للأروآح
يا عمي عصمت يا خالي
البال معاك يرتاح
شاعر جميل المشاعر
والقعدة واسعة براح
فين الهلالي فين
زي القمر وضاح
اصحي يا نايم خلاص
وقت السحور وفلاح
وابدأ صيامك صلاة
تراتيل أيآت ونجاح
أصحي يا نايم يا نايم أصحي .... وحد الرزآآق
رمضآآن كريم
في سجال ولا أروع كنتِ السيدة نشوي
تحياتي لروعة حضورك وجميل مشاركتك
كل عام وأنتم بخير
23-6-2015
الشريف الهمامى
ردحذفأصحي يا نايم وحد الدايم
رمضان كريم
مسحراتي منقراتي علي طبلتي دقيت
يا منتدانا يللي حدانا
كل الاستاذة والأحبة
مسحراتي انا جيت
يا عم سيد عاوزين نعيد
وجمال مطاوع م القهوة راجع
عبد العزيز استاذ لذيذ
ايوه يا عم رماح
الفجر قرب
يلا نجرب
قلمك يا شاعر
جامد وواعر
بيقول قوالة
خليه رسالة
اصحي يا نايم وحد الدايم
يا كبير يا عمدة
يا ركيزة ساندة
علمني تاني واخويا هاني
البت حلوة ريتاج
يا اهل السريا
طب مين معايا
صحي الحبايب والقرايب
وكل اللي غايب
مسيره يرجع برضو زي زمان
اصحي يانايم وحد الدايم
والكريم رمضان
24-6-2015
هههههههههههههههههه
ردحذفمســحراتى الهمام وغيتك الترحــال
لفيت ولفيت بين المنتديات رحــال
وناديت على كل اسم فى منتدى افندينا
ودقيت على طبلتك وغنيت لهم موال
اقول واعيد
واصلى على الحبيب
اصل الرجل تدب مطرح ما تحب
ماشى ماشى ...حنعديها المره دى
24-6-2015
الشريف الهمامى
ردحذفأصحي يا نايم وحد الدايم
رمضان كريم
مسحراتي علي طبلتي دقيت
يا ولاد حارتنا
يا اهل بيتنا
يا مين يغيتنا
والغلا بقا نآآآر
قالولي فوض
الله يعوض
أصحي يانايم ووووحد الرزآآق
الناس جعانة
ومفيش معانا
ولا عاد حدانا
والرزق ميكفيش
والدم رايح وكتير دبايح
ورجع طابور العيش
اصحي يانايم وحد الدايم
هو اللي باقي ولغيره ما تشكيش
رمضااان كريم
نعم سيدة نشوي كانت لهناك ولكن لم تري النور هناك
فأردناها هنا وفي الكثير من الاماكن المحببة
ولكن وعد لتناول السادة والسيدات غزل وحنين وبأسمائهم
كل عام وأنتم طيبين .
25-6-2015
الشريف الهمامى
ردحذفاصحي يا نايم كفاية
قوم سحورك بيناديك
فجر قرب قوم معايا
والأذآن ينده عليك
مسحراتي مغنواتي
اصحي يا نايم وحد الدايم
رمضان كريم
عادل ياشاكر يا احلا شاعر
نورت دارك احنا عيالك
اكتب وقول غناويك
افرح يا عمدة كل الحبايب
ملمومين حواليك
وانا صنعتي مسحراتي في المنتدي جوال
حبيت وغنيت وطبيت
عاشق قصيدة والحروف مواويل
عمي رموني لو يسألوني
رآح أقولهم فنان
للقدس شاعر يحكي مشاعر
حلو الكلام كروان
وكل حتة من قلبي فص من كبدي
مصر تسبيحة في كل لسان
اصحي يا نايم
رمضااان كريم
فما أجمل من قطاف الدفء وتغاريد العصاقير
هديلها أنت الأستاذة / أنثي المستحيل
للهِ أنت ومن وهبكِ سحر البلاغة ورقي الأبجدية
كل عامٍ وأنت إلي الله أحبُ وأقرب
26-6-2015
الشريف الهمامى
ردحذفأصحي يا نايم وحد الدايم
مسحراتي وسماح ان غبت عنكم يوم
خدني الهوي منكم وكتير ساعات الصوم
الشمس حامية واللقمة نايمة
للرزق اسعي مفيش عتاب ولا لوووم
يا عمدة سيبني انا ايه اللي جابني
دي صنعة صعبة شقيانة تعبة
ع الشط ياما الكتير بيعووم
حبيت وطبيت كما العاشق ليالي طوال
خيبة قوية والجميل معدوم
اصحي يانايم وحد الرزاق
مسحراتي منقراتي
اصحي يانايم يللي انت غافل
الفجر قرب والسعات بأذان
يا مصري بلدك اهلي واهلك
منهم فقير وجعان
احسن لجارك
واكرم عيالك
ربنا الرحمن
اصحي يا نايم رمضان كريم
29-6-2015
الشريف الهمامى
ردحذفاصحي يا نايم وحد الدايم
مسحراتي مش شغلتي
غصبوني بيها غصب
معرفش اقول الوحش
قلبي ماليه الحب
جروني ع التجريح
وعلمتهم تفريح
ضاعت حروفي كل القصايد
عملوا المؤامرة ايه اللي عايد
يا كبير يا عمدة الطعنة جامدة
وقطعوا التصاريح
اصحي يا نايم وحد الرزآآآق
مصر الحبيبة صبحت غريبة
تنام وتصحي كارثة ونصيبة
ومفيش مقام لضريح
نعمل وليمة حلوة وعظيمة
خروفين وعجل دبيح
وايدين كريمة تتطعم المساكين
انا بشتكيلك م اللي ظلمني
يارب جيرني م اللي حرمني
حسبي ياربي وانت نعم وكيل
اصحي يا نايم يا نايم اصحي
رمضااان كريم
30-6-2015
الشريف الهمامى
ردحذفمسحراتي منقراتي
وطبلتي زعلانة
الدنيا ضلمة والنجم ساطع
والنور دا قاطع
اصحي يا نايم يا نايم اصحي
ووووحد الرزاق رمضان كريم
جراح مشاعر والحرف واعر
ما هو اصله شاعر
عاوز يسحر خليه ينقر
مسحراتي جديد
وحبيبتي نايمة
اشواقي عايمة
والدنيا صايمة
بس قلبي سعيد
يا عمدة فينك اوعي تسيبني
شوفني بعينك وابقي حاسبني
انا لو كلامي يحيد
يا اهل السرايا
سامعين ندايا
ومين عليا ومين معايا
انا مش رآح اشكي
ولا مرة هبكي
من فعل ندل خسيس
العبد واطي للي يطاطي
والطعن غدر وعيد
انا بس صبري واللي هيجري
عدي يا رمضان
اصل الرجولة مش فضايح
الرجولة عطور زهور والمسك فايح
يا مستخبي جوه في عبي
اظهر وبان بأمان
انا حرفي غالي من جوه عقلي
رايق يا بالي
انا لو بعدي علشان دا ودي
والرجولة شريف
اصحي يا نايم الحق سحور ورغيف
السعي للصوم خير من النوم
رمصآآآآن كريم
1-7-2015
الشريف الهمامى
ردحذفمسحراااااتي مغنواتي منقراتي
اصحي يانايم يا نايم اصحي
يا ولاد حارتنا يا غوالي يا عوالي
يا اهلي انتوا يا عيالي
يا خالتي نادية رايقة وهادية
رني الغوايش شخليلي
علي طبلتي حنيت
والبت ليلي راحت تنادي
وصباح قصادي
وكريمة فوق في البيت
يا عم صبحي انده لمرسي
الفجر قرب للصلاة اتوضيت
اصحي يا نايم رمضان كريم
حبيبتي يا غنوتي
عالية بصحيكي
شوفت العيون السودا
والكحلة في عنيكي
خلخالك الرنة
رقص قلوب شباب الحي حواليكي
وانا صنعتي مسحراتي
قصيدة لساني غناها
وطبلتي تغنيكي
سحورك الشهد رطب علي روحي
وانت في احضان الليالي
وبضحكتك بوحي
رمضان سعادة في وش السنة والعمر
وسحور
ولاد البلد مليان حنان مع طهر
واللمة فوق بعضها
حوالين طبالي الشهر
يدعوا لرب كريم ما يكون فراق ولا هجر
يكفيكوا شر الخيانة
وابعد بعيد يا غدر
بالحب متجمعين حوالين صينية حنين
السعي للصوم خير من النوم
رمضآآآآن كريم
2-7-2015
مسحراتى منقراتى مغنواتى بقول الحان
ردحذفبمشى يوماتى بيحكى حكاوى و قصص كمان
على طبلة صوتها حنين نياتى اصحوا وفوقوا لما هو ات
ابنى بيصرح وشايل سلاحه فى ايده وبيقول بلدى
شايفه دمه سامعه انينه وصرخته
ازاى تكون مصرى وانت اللى قتلت ولدى
بدعى عليك من قلبى وبأيدى حاخد تار بلدى
اخى الهمام
كلماتك اليوم فكرتنى بمسحراتى زمان اللى يلف فى الشوارع والحارات وينادى بالأسماء
موضه هذه الايام يمر مره فقط فى شهر رمضان يخبط على الشقق وينادى الاسماء اللى دونها منك قبل رمضان
الله عليك يارمضان
يعيده عليكم وعلينا بالخير يارب
شكرا اخى الشريف
وتقبل مرورى المتواضع
2-7-2015
الشريف الهمامى
ردحذفاصحي يا نايم وحد الدايم
مسحراااتي السعادة
رمضان شهر العبادة
منورينله فااانوس
طلع يا مسلم وادينا العادة
واحدة وزيادة
الحب مش بفلوس
اصحي يا عم خميس
ورشة حدادة
قهوة وسادة
دي مش عيادة
اصحي يا نايم وحد الرزاق
مسحراتي الهنا والنور بيضوي هِنا
حبيت وطبيت وأدبيت
ولا كان نصيبي انا
والحب أعمي ومرايته حولة
آه يا نصيبي ولا كان حبيبي
بس بيه ورضيت
يا عم حمزة احلقلي راسي
نعملي دقني
أنا بكرة فرحي
علي حلو واتمنيت
دي حبيبتي عالية
اصيلة وغالية
هيا ست البيت
جبتلها حنة من نور وجنة
يا عم سعد يا عطار
حنة سوداني
وبخورها جاوي
والعود ومسك بألف ورقة دينار
اصحي يا نايم واطلع يا عايم
بحر حبي غريق
ادعي الحبايب وانده يا غايب من كل صاحب
ولم كل صديق
سحورنا نعمة والدنيا سامعة
ومسحراتي جريء
دي ليالي نور ونجومها حور
اصحي يا نايم يا نايم أصحي
وحد الرزآآآآق
رمضان كريم
الأخت الفاضلة سيدة / نشوي
كنت أود أن لو عرفت أسماء أخوتي وأخوآتي هنا في غزل
لناديت عليهم بأسمائهم الكريمة . ولكن هو التقصير مني
أستاذتي الفضيلة كنتِ هنا فأزدانت الصفحات بكم وبراقي تواجدكم
تحياتي لحضرتك كل عام وأنتِ وغزل في القمة
3-7-2015
الشريف الهمامى
ردحذفاصحي يا نايم وحد الدايم
رمضان كريم
مسحراتي علي طبلتي دقيت سيكا وبياتي
يا بت يا سعدية رني بخلخالك صبا
انا كل يوم الصبح اشوفك
عايقة زي عنقود العنب نهاوند
شالك قطيفة في ضحكة لطيفة
يللي ف جمالك ما في زيك حد
عيون الغزالة فيهم قوالة
علي وتر العجم بتهزي بيها السد
والضحكة رايقة بسمات وما تتعد
اصحي يا فتحية
يا ام الولاد يا عفية
من بعد ابوهم مملاش عنيكي حد
اشطا وحلوه وقمر
منجاية زبدية
تحفر جبال الصخر
ومن جبين الشرف
عملت رجال بالصبر
اصحي يا نايم هنا صحصح معانا وفوق
يا عمدة عم الناس
اتحدي كل البشر
بمسحراتي الشريف
مين اللي رد وقِدر؟
لو شوفت شاعر صحيح
يرمي بياضه حرف
وانا هبين زين
وهيبقي ممنوع صرف
اصل الرجولة دي اخلاق
مش خوف مخبي وضعف
ورا ضهور نسوان
ترفع سلاح العنف
لو انت راجل قلم
اعزف علي طبلتك
وارميه بعيد الدف
واصحي يانايم خلاص
مد الخطاوي وخف
مبقاش خلاص في الشهر
بطل نميمة وعِف
اصحي يا نايم يا نايم اصحي
وووحد الرزآآآق
دي ليالي مغفرة لآفة ومتدورة
حسنات كتيرة ورحمات مليانة متبعترة
رمضآآآن كريم
4-7-2015
المسحراتى الهمام
ردحذفدقيت وناديت
دقة حب للأوطان
دقة تجمعنا لتلاوة القرأن
المسحراتى الهمام بتدور من زمان
على ساكنى المنتديات
اسمهم موجود فى الرئيسيه عند المراقبين على الاقسام
واتفضل أتده ونادى
على كل واحد وقت السحور
4-7-2015
الشريف الهمامى
ردحذفمسحراتي منقراتي
حبيت وطبيت عاشق غزل وحنين
دقيت وناديت علي نشوي
ولغة العظماء الصمت حسين
علي طبلة الحب دقيت تلت دقات بحنان
دقة لقلب النور نورآن
ودقة لعين الحبيب يرق عليا وابقا سعيد فرحان
ودقة عشان الجميل اللي بقالو يومين زعلان
اسمك علي جبين القمر مكتوب
وصورتك في السما علياء
اصحي يا ست جيهان خليل
السنا وحمزة
في جواهر مصر صلاة ت العصر احبابي
وعزة فهمي تنده للندا وصابر
وعم فحمة كاتب للكلام شاعر
وقلب شجاع اصحي يا فارس
في شهر الصوم غايتي جنة
يا روح قلبي يا ديدي نقشة ت الحنة
اصحي يا نايم
بكره راح انده علي التانين
احبابي غزل وحنين
السعي للصوم خير من النوم
والصلاة قرآن
احنا فـ ليالي العبادة وفـ عشرة ت الغفران
رمضآآآن كريم
شكراً جزيلاً للسيدة الأستاذة / نشوي سعيد
تفاعلها وتواجدها القيم
5-7-2015
الشريف الهمامى
ردحذفاصحي يا نايم وحد الدايم
ياليالي مسحراتي
طبلته علي دقتين
صحي نايم سحور يوماتي
نومة صاحية وغفلتين
يا ليالي والهدية
حلوة غالية من الكبير
فرحة طارحة دي هنية
سيدة جنب الحسين
مسحراتي قوم يا خويا
قبل ما الايام تروح
صحي امي وقول لبويا
وأوعي بالأسرار تبوح
مسحراتي قوم يا عمي
صحي أخويا وأختي جنبه
الأصول سايلة ف دمي
والغلط بريء في ذنبه
مسحراتي آه يا خالي
لو هميل انت الحنين
احكي عندك روق يابالي
خفف الأوجاع وهين
مسحراتي بالغناوي
كل يوم بجديد أغاني
يسمع القلب اللي غاوي
يا ريتاج يا بنت هاني
مسحراتي ليالي عودي
خير ونعمة ع الحبايب
هات زبادي يا واد يا بودي
جيب لتيتة حليب ورايب
يا ليالي يا صيام
بركة رحمة فاض علينا
كل شر فيك حرام
للسلام مادين ايدينا
ياليالي والأدآن
الحقوه قرب يأدن
قلبنا مليان حنان
والكريم عنا يهون
اصحي يا نايم يا نايم اصحي
وحد الرزاااق
رمضان كريم
6-7-2015
الشريف الهمامى
ردحذفاصحي يا نايم يا نايم اصحي
وحد الرزاااق
رمضان كريم
يا ليالي مسحراتي
جبنة بيضة وفول حراتي
عيش مرحرح والكنافة
دايرة لافة في الصجاتي
معدة رايقة وذهن صافي
وجبة من صنف النباتي
ياليالي قوم وصحصح
دقتي ع الباب يوماتي
يا حبايب يا قرايب
عزوتي اهلي وخواتي
يللي ناسي فوق وفكر
بنتظر انا بالسعاتي
كل يوم انده واصحي
مرة اغني ومرة اهاتي
ياليالي انا والقصايد
قصتي الوجع اليوماتي
نبض شاعر يا حروفي
نزف من فيض الأهآتي
يللي بايع في الغوالي
بالخسارة مدهباتي
واشتريت منهم رخيص
الحديدة مصدياتي
مسحراتي انا واليالي
طبلتي ومغنواتي
يا ليالي يا بن بلدي
الرجولة الصعوباتي
نبني مصر بلدنا تعلا
فوق لفوق كل الحاجاتي
اصحي يا نايم يا نايم اصحي
رمضان كريم
ليالي نور قوم للسحور
وحد الرزاااق
رمضان كريم
7-7-2015
أحمد
ردحذفسلام الله عليكم ..
والله يحييكم ..
أصحى يانايم أديني جيتكم ..
رمضان كريم ..
الشريف الهمامي والطبع حامي ..
والحرف له معنى بالحكمة يسمّعنا ..
على طبلته أحلى كلام ..
اصحى يانايم واسمع كلامي ..
فـ سحوري وصيامي ..
على طبلة الباشا وفوق ..
ركعتين فـ الليل ينفعوك يوم الحساب..
والجنة قدامك والرحمة من فوق ..
فـ السحور بركة .. اصحى يابركة ..
وفوق ..
خدنا إيه مـ النوم ..
دي حكمة الصوم في الصبر ..
والتعب والحركة ..
يارب أرحم كل شهيد ..
وصّبر قلب كل موجوع ..
وأنصر الحق واهدي كل مخدوع ..
وإن تُهنا وغفلنا عن ذكرك ..
سهل لينا الرجوع ..
أصحى يانايم وحد الرزاق ..
رمضان كريم ..
اصحي ياهانم الفجر على وصول ..
وإن تعبنا مـ المشي مشهنتعب من القول ..
بيقولو الكلام ببلاش ..
وساعات كتير ميسواش ..
لكن كلامنا هنا غالي ..
في حضرة الغالي ..
شريف والطبلة غالية ..
والمقام عالي ..
على طبلة الباشا ياحتة بغاشة ..
يا ايمان يا زهراء ..
يا صابر يا ضياء ..
يا مريم يا مشمشة ياغزل ..
يا نهى يا دعاء يا ندا ..
ياميدو ياصمت ..
يا نور يا علي ..
يا عزة يا سنا ..
ياحمزه يا بسبوبسة ..
يا خالد يا حبيبة ..
يا ناجي
يا وهيبة! ..
ياحسناء يا نادين صحي فتافيت ..
وروز وايمن ..
واوعي تنسي نانسي ..
اصحي يانوسه ..
اصحى يا عادل ..
وبلاش تجادل ..
النهار طويل والشمس حامية ..
مش وقت بامية خلينا فـ الفول ..
طبق الفول ينادي يقول ..
السحور السحور كُلني وانسى ..
دا المستحيل انثى ..
والطيبة أنوش ..
أوعو تنسو وما تسموش ..
ياعم يا زياد ..
يا وردة يا ياسمين ..
يا أم أياد ..
يا جيهان..
يا حنين ..
اصحو ياحلوين ..
اصحى يا زنان ومتقولش تعبان ..
فـ السحور بركة اخزي الشطان ..
يا الله ..
وقول بسم الله ..
اصحي ياريم رمضان كريم ..
والحسنات بزيادة ..
مش وقت إعادة نقرتين بزيادة ..
والثاثة ثابتة..
اصحي يانايم وحد الدايم ..
رمضان كريم ..
اصحي ياجيرسي نفسي ..
فـ يوم من نفسي ..
تصحي على طول ..
من غير ما يروح حسي ..
ويقوم علّيا ضرسي ..
اصحى يانايم وحد الرزاق ..
رمضان كريم ..
اصحى يا استاذ عبده ..
انا كل يوم عنده بابك مبيتقفلش ..
وحشتنا طلتك ومنك منتحرمش..
متجيش بأيدك فاضية ..
وخليها خمسين قرش ..
ياعم يافارس علـ الباب ..
انا حارس قوم ولّع النور ..
بطبلتي انقر نقرة ونقرتين ..
مش عايز تسحّر قوم اعطني قرشين..
رمضان كريم ..
اصحي يا بروك ..
الطبلة سخنت واديني بدق ..
وعيال الحارة اتلمو علّيا ..
من كل جحر وشق ..
واللي ممعوش فكة أنا افك ..
اصحي وخليك ايزي ..
مبتسحروش ليه ..
بالعربي وبالانجليزي ..
مش ماشي إلا بربع جنيه ..
اصحى يانايم ..
وحد الدايم وحد الرزاق ..
رمضان كريم ..
اصحي ياهابي مون ..
ومتنسيش المستكة والزعتر ..
والفول ميحلاش إلا بفص لمون ..
رمضان كريم ..
اصحى يا ايهاب وكفياك غياب ..
وصحي معاك الاهل والاحباب ..
اصحى يا جنرال ..
يا محمد افندي السحور عندي ..
متخدش على كلامي ..
دا ميه فـ الغربال ..
انزل ياريس ومتنساش الريال ..
اصحى ياعم جواهر ..
طول الليل ساهر ..
وتغلبني فـ الصحيان ..
ادق مهما أدق وأنقر مهما أنقر ..
عامل نسيان ..
ياعم مش بنق بس نظرة للغلبان..
اصحى يارمضان اليوم عشرين عدت..
وباقي عشرة منه ..
واللي يحسن الظن ..
يبعد الشر عنه ..
عشرة آواخر وليلة قدر مستنية ..
تزّف لعريسها صايم وقايم ..
ودعوة مستجابة ساعة مغربية ..
وذنوب مغفورة اصحى يانايم ..
وحد الدايم رمضان كريم .
.........
شاعرنا الجميل الشريف تهامي
مريت على موضوعك الرائع بطبلة صاج واتعشم ألا أكون "بطبل فـ المطّبل" ههههههههههه
كل عام وانتم واعضاء وإدارة غزل وحنين بخير وعافية وسلام
اعاده الله علينا وعليكم وعلى الامة الاسلامية بالخير واليُمن والبركات
استمتعت بعزفك على الكلمات وابداع حروفك الذي لا يقاوم
ولولا الظروف لسعيت لنيل شرف مشاركتكم هذا الجمال
ود يليق بالشريف
شكراً لك
تقبل تحيتي
7-7-2015
احمد مسحراتى وغيته الترحال
حذفلف ولف بين المنتديات رحال
ونادى على كل اسم فى غزل ماخلى
ودق على طبلته وغنى لهم موال
كل سنه وانت طيب يا احمد....وحشنى يابنى انت فين
ياسيدى اسال وبلاش البعد ده
رمضان كريم
8-7-2015
الشريف الهمامى
ردحذفاصحي يا نايم وحد الدايم
رمضان كريم
مسحراتي يا ابن بلدي
يللي ساكن في الحواري
احترامي كتير وودي
بعدت عني سكنت جاري
اصحي يلا للسحور
قمرة طالعة ونجم ساري
مسحراتي ف الشوارع
اصحي يا نايم وجايع
صلي فجرك والنوافل
والسجود باكي وخاشع
مسحراتي يا بعيد
حبة حبة كون قريب
جوه اهلك كون سعيد
في القلوب ود وحبيَّب
البعاد هجر واسية
الحنان خليك قريب
مسحراتي والكلام
حرفه ليه مظبوط منظم
موهبة ومن غير علام
غنوتي ع الطبلة قسم
مسحراتي مفيش عتاب
والخصام كفي الملائمة
راح كتير منهم صحاب
بقيت الخيبة الندامة
مسحراتي مع الشريف
كل ليلة وكل ساعة
فينكوا والحرف النضيف
جمع من لمة وضاعة
مىـ اللي فيكوا اسمه شاعر
ينسي يوم لبن الرضاعة
مسحراتي كل يوم
من كلامي جديد قصايد
يحكي عنه سحور وصوم
غني لحن عود يا فايد
مسحراتي انا وابن شاكر
سيرة حلوة ونشأ صالح
تقرا صح تكون مذاكر
تبقي يوم فالح وناجح
مسحراتي هقول سلام
يللي بكرة صبحت صايم
شوقي للاحباب غرام
يا اصول اهل المكارم
السعي للصوم خير من النوم
ليالي جميلة ونسمة عليلة
وحد الرزاااق
رمضان كريم
أخي الحبيب الأريب / أحمد
للهِ دُرك يا رجل وهذة اللأليء المتلألة في وآحة الغزل
والله ِ لأنك ألف رائع وقد سعدت كثيراً بمعزوفتك الراقية
بكل الحب أُحييك وتقديرات كثيرة أهديك
كل عام وأنت إلي اللهِ أحبُ وأقرب .
أحترامي وسيدة الدار أستاذة نشوي
8-7-2015
الشريف الهمامى
ردحذفاصحي يا نايم وحد الدايم
رمضان كريم
مسحراتي لأهلينا
علي طبلته دقة صحينا
دقدق يا دقدق سمعنا
انغام كلامك تشجينا
مسحراتي يا عمدتنا
اصحي خالتي وجاراتنا
والباشا فيها كمان والبيه
ومحمد يا عمدة افندينا
مسحراتي وعلي رجلي
ادبح خروف ضحي بعجلي
واعمل موائد للرحمن
عمرانة والله تكفينا
مسحراتي في سرايآ
ولا فيش معايا ولا ورايا
وان تهت مرة ف بحر الشوق
علي اي شط ترسينا
مسحراتي ورباعية
ولا همني م الناس ديا
موال كتبته في قصيدة
دا اصل فن العربية
مسحراتي يا أصيلة
يا عالية ع الناس وكبيرة
انت الحبيبة يا مليكة
والتانية واطية وقليلة
مسحراتي انا همامي
أشرآف يا اهلي وعمامي
طيبين نحترم الناس
رمضان صلاتي وصيامي
مسحراتي هصحيكم
وحبة حبة انا هرضيكم
وكل من له حق تمام
هنوطي نرفع معاليكم
مسحراتي وورينا
ان كنت تقدر تجارينا
من حارة ولا كدا ف شارع
او حتي فوق في التراسينا
أصحي يا نايم يا نايم اصحي
ووووحد الرزااق
رمضان كريم
9-7-2015
الشريف الهمامى
ردحذفاصحي يا نايم وحد الدايم
رمضان كريم
مسحراتي انا
ولا شفت غيري يقول
طب مين مسك طبلتي
مين دق علي ارغول
مين اللي قال الكلام
شهده وسال معسول
ولا اللي مسك العود
وتره الحنين معدول
يا كمان كمنك جيتار
والعزف كان بأصول
بأكورديون الأمل
قسم درامز طبول
بونجز وينجز اوام
من غير كلام علي طول
كان البيانو الأصل
اورج اليالي عزول
مزمار بلدنا زَعَق
انا عنه مش مسؤل
لو طبلة يوم خسعت
انا بالربابة هقول
مسحراتي الحبايب
يا فل علي ياسمين
ورد الجناين يا عالية
الحسن علي خدين
اصحِي يا قلبي سحورك
طبقين حنان وحنين
والحلو شهد الشفايف
حادق يا شرطة عين
رمضان كريم السحور
فاضل عليه ساعتين
اصحي يا نايم يا نايم اصحي
رمضان كريم
10-7-2015
الشريف الهمامى
ردحذفمسحراتي منقراتي
مغنواتي يوماتي هنا في غزل وحنين
اسمع كلامي اعقله
كلام مظبوط في نصيحة
حرف ومعاني وجملة جميلة توضيحة
اصل الحياء الأدب
لم الضفاير دهب بعد الزينة تسريحة
وارخي الخمار العفة قيمة واضحة وصريحة
اصل الشرف لو راح يسيل الدم ودبيحة
اصحي يا نايم وفوق
جهز سحور الصيام للعبادة بشوق
يا معاشر الناس عاشر بس بالطيب
ادخل عليهم خليك حلو وقريب
وان شوفت فيهم وحش
متقلبش وتعيب .
ولاد حارتنا زي الدهب أصلية معادنهم
يحبوا الناس ويدوهم ولو كانوا معاندنهم
ولا يعايروا ولا يمنوا بعطاياهم
بأخلاقهم يعاملو الناس
ولو ما كانوا علي دينهم
مسحراتي الهوي والحب كدا في النور
غزل الحنين رجعك مهما تلف تدور
اصحي يا نشوي وهاتلي احلا سحور
قولي للحبايب هنا ...غزل الحنين مبدور
السعي للصوم خير من النوم
دي ليالي سمحة ونجومها سبحة
اصحي يا نايم يا نايم اصحي
ووحد الرزاق
رمضان كريم
11-7-2015
الشريف الهمامى
ردحذفمسحراتي ليالي زمان
صاحبت يوم طبلتي
دقيت علي البيبان
صحصحت كل الحبايب
نقوم نصوم رمضان
كانت المحبة كتيرة
كان اللقا احسان
اللقمة كانت رخيصة
والكل كان فرحان
كانت كفاية وبركة
كان الغموس غفران
دلوقتي قسمة علي اتنين
واحد علي الحق والتاني مع الشيطان
اصحي وفوق كدا يا وطن
واوعي يهمك مـ المحن
تعالي نتلم تاني جوه الصواني
في سحور رمضان
امتي الفرح يجمعنا
وليه الحزن وأشمعنا
مفيش غيرنا ! حيطان واطية
كفاية القسوة يابلدنا
بتاكلي وتهبشي فخيرنا
وتدي للي مش منك
وتقسي عـ اللي شال عنك
بطيبة نفس يا ردية
يا عم يللي العقل فوق راسك
اسمع كلامي نصيحة واكتبه فكراسك
وقوله للي معاك من اهلك ومن ناسك
الحق حق وهيظهر
مهما عليك الباطل لو حتي يوم داسك
اصحي يا نايم جهز سحور الحق حرية
اصحي وصلي الفجر وسيب النفس امارة وعندية
السعي للصوم خير من النوم دي ليالي جميلة وهدية
رمضااان كريم
12-7-2015
الشريف الهمامى
ردحذفاصحي يانايم وحد الدايم
مسحراتي منقراتي مغنواتي
الصدق في كلماتي
انده واهآتي واداري مواجعي وأهآتي
هاتي الأمانة ف هدية
للبت عدلية
تلت بنات ولدين ست الكل يا ولية
رفيقة ت عمر عشرية
اللمة حلوه حولين الدايرة طبلية
ورزق كتير فول بالزبدة عجمية
وجبنة بيضة
وبيض مسلوق في طاجن سمن مقلية
اصحي وفوق و عـ النبي صلي
دا لولا النبي ماكان في جوامع
ولا فيه ناس بتصلي
اصحي يا نايم ساعة حلوه وندية
ألحق بواقي الرحمة وعطية
الست ذينب جنب الفاطمة نبوية
روحت الرفاعي مواكب رحمة ياساعي
في سيدنا الحسين علي الصفين
ناس واقفين وبتراعي
ليالي رحمة والغفران ياداعي
السعي للصوم خير من النوم
ليالي سمحة والسبحة فرطت
كلامي الصدق يا واعي
رمضان كريم
13-7-2015
الشريف الهمامى
ردحذفمسحراتي
انهارده غير اي يوم تاني
بيدق علي اوتار
قلبه وصحاني
صعبان عليا حبيب
هاجرني ونساني
القرب وصل ووصال
الهجر لهفة وجفاء
ومفيش بأيد محروم غير الرجاء ودعاء
اسقيني قبل السحور
من قُلتك عطشان
مسحراتي مشاعري من صميم القلب
ولا زلتُ في حي الهوي متنقلاً
إلي أن بدا سر الغرام بمهجتي
علي عرش قلبي بالجمال قد استوت
أنثي العفاف
أهواك يا منيتي وسيدتي
عبدٌ أنا والعبدُ مملوكٌ وإن عشقا
لله دُرك يا سمراء ما نظرت عيناي لا بدراً ولا شفقا
يا ليلة القدر رؤياكِ
يا وردتي الحمراء اشتاق عطر المسك من خديك
ومن عينيكِ نظرة
مسحراتي العاشقين
اصحوا يا كل المجروحين من الهوي
انووا صيام الحب لوعة من الجوي
رمضااان كريم
14-7-2015
الشريف الهمامى
ردحذفمسحراتي
منقراتي مغنواتي
وبكتب الأشعار
الشعر كان غيتي
وبقوله ليل ونهار
اخبط علي اللبواب
اصحي الكُبار وصغار
واقف فـ قلب الميدان
واهتف مع الثوار
عملوا المؤامرة علينا
خدها الغراب وطار
الجنة فيها الشهيد
اما الجبان ف النار
مسحراتي يا بلد اصحي بقا وفُوقي
سيل الغباوة بقا تحتي ومن فوقي
لو مرة تيجي تطاوعي
ترتاحي وتروقي
دي الفرحة ليها زمان غايبة وبدالها دموع
والحزن راكن معشش للبهجة قال ممنوع
حتي الحروف ف الحلق الصمت مانعها
لو صرخة تزعق هنا كان للسعادة رجوع
اصحي يا نايم كفاية
وقت السحور ما خلاص
ودعوة ت المسكين
م القلب وبإخلاص
السعي للصوم خير من النوم
دي ليالي محبة
عمايل خير علي الميزان طبة
رمضاان كريم
15-7-2015
الشريف الهمامى
ردحذفاصحي يا نايم وحد الدايم
رمضان كريم
مسحراتي الأوآخر
ايام رضا وغفران
الاولي رحمة لنا
والتانية المغفرة
من ربنا الرحمن
والتالتة عتق الرقاب
من مالك النيران
مسحراتي الشهر
ماشي خلاص ورحيل
ليلة ووراها يوم
وكمان سواده الليل
يا ليلة القدر حفينا
وهاتي الرحمة تكفينا
تعبنا من ذنوب عصيان
صلاة الفجر محلاها
قلوب طاهرة بتقواها
بتتهجد وتتركع
طاعة لربها قربان
مسحراتي خلاص
قرب يا فجر اذان
جهزي يا نشوي العيدية
بالبر والإحسان
رمضان كريم في الغزل
علي كل كان من كان
السعي للصوم خير من النوم
أخر سحور اليوم
رمضان كريم
أحبائي أخوتي وأخوآتي غزل وحنين
كل عام وأنتم بخير في أخر حلقات المسحراتي من صميم القلب أحييكم
وأتنمي لكم عيداً سعيداً
16-7-2015