مَلعون أبوك ياخوف شعر/محمود العزب

مَلعون أبوك ياخوف
شعر/محمود العزب

مَلعون أبوك ياخوف 
لَـوْ سِبتِنـا نعانـى
وتقول لِنا دى ظروف
وطَبيعتـى جابرانـى
إنِّـى أسَـكِّـتكـوا
ولا تِنطقـوا تانـى
واقنِعكـوا بِخيبِتكـوا
ولاابان لكوا الجانـى
واقلِب حياتكوا جَحيم
واقتِلكـوا مَـجانـى
وانا حُبِّى فيكوا عظيم
وبتِرضـوا بِهوانـى
وانتوا اللِّى شعب كريم
وبتِنسوا فـى ثوانـى
وانـا اللِّـى خَمِّيتكوا
وعاجَبكـوا طُغيانـى
ونِفسـى يوم اشوفكوا
بتقاطعـوا حِـرمانـى
وبتلعَـنـوا خوفكـوا
وضَميركـوا مَشَّانـى
وبِتمَشُّوا فى أموركـوا
وحياتكـوا تِنسانـى.

29/6/2018