علامات بتقولك إن اللي قاعد معاك مش مستريح ولا طايقك

 

أوقات كتير بتبقى قاعد مع حد ومجبر تكمل القعدة دي معاه سواء عشان شغل أو عشان موقف معين مضطر فيه أو بتعدي أزمة أو أشكال كتير ولو أنت شخص هادي بطبعك وبتعرف تتقبل الأوضاع دي هتحاول تلهي نفسك في أي حاجة وتعدي الوقت لكن لو خلقك ضيق أو مابتعرفش تعدي الأوقات هتبدأ تفرك.. وفي الحالتين عموما لو الشخص ركز معاك هيبان عليك إنك مش مستريح في قعدتك معاه أو إنك مش طايقه.

وخلي بالك إن زي ما أنت ساعات بتقعد مع ناس مش طايقهم أو مش مستريح معاهم.. فيه ناس برضه بتقعد معاك مش طيقاك.. فتعالى نقولك شوية حاجات تعرف بيهم إزاي الشخص اللي أنت قاعد معاه ده مش مستريح في قعدته معاك وعايز يقوم من غير ما يقول: 

بيحاول يتجنّب التواصل البصري:

لو لاحظت إن الشخص مش بيبص في عنيك كتير أو بيحاول يبص في أي حاجة تانية وأنت بتتكلم معاه، ده ممكن يكون دليل إنه مش مرتاح. الناس العادية بتبص في عنين بعض لما تكون مرتاحة وبتحبّ التواصل.. وده حسب دراسة عملها عالم النفس الأمريكي Kleinke سنة 1986 بتقول إن الأشخاص اللي بيحسوا بالتوتر أو القلق يميلوا إنهم يتجنبوا الاتصال البصري .

ردود أفعاله قصيرة ومختصرة:

لو الشخص بيردّ عليك بكلمات قليلة أو ردود مختصرة جدًا من غير ما يحاول يفتح مواضيع جديدة، ده ممكن يكون إشارة إنه مش عايز يكمل الكلام معاك أو مش مهتم بيه.. وده حسب دراسة نشرتها “Burgoon and Hale” سنة 1987 أكدت إن التواصل غير اللفظي زي الردود القصيرة ممكن يكون دليل على وجود توتر أو رغبة في البعد.

جسمه مش مواجه ليك: 

لو لاحظت إن الشخص جسمه أو رجله مش موجهة ليك وأنتوا قاعدين مع بعض، ده ممكن يكون دليل إنه مش مرتاح، الوضعية دي بتعبر عن الرغبة في إنهاء التواصل أو الهروب وده زي ما قالت دراسة نشرتها “Mehrabian ” سنة 1971 عن تأثير وضعيات الجسم على التواصل.

عدم اللمس أو التلامس الجسدي:

فيه دراسة دراسة عملها عالم النفس “Hertenstein ” سنة 2006 بتقول إن اللمس بيساعد إن فيه مجموعة كبيرة من المشاعر توصل بمافيهم الرفض أو الانزعاج من الشخص.. عشان كده لو التلامس الجسدي زي السلام أو اللمسة الخفيفة اللي على الكتف دي بتكون علامات على الراحة والقرب، فلو الشخص دايمًا بيتجنب ده معاك ده ممكن يكون دليل إنه مش مرتاح معاك.

بيحاول ينهي المقابلة بسرعة: 

لو الشخص بيحاول يختصر الوقت اللي بيقضيه معاك ودايمًا بيقول إنه مشغول أو عنده حاجة يعملها، ده ممكن يكون إشارة إنه مش عايز يكون حواليك، وده حسب دراسة عملها عالم النفس “Gottman “في  1993 عن ديناميكيات العلاقات بين الناس

بيرفع حواجبه أو بيظهر ملامح عدم الراحة:

عالم النفس “Ekman” قال إن تعبيرات الوش بتدل على علامات والتعبيرات دي ممكن تبقى إشارات قوية على مشاعر داخلية غير مريحة.. وفي بعض الأوقات ملامح الوش بتكون معبّرة عن اللي جوة الشخص، مهما حاول يسيطر عليها، فلو لاحظت إن الشخص بيرفع حواجبه أو بيظهر علامات على وشه زي القلق أو التوتر، ده دليل قوي إنه مش مرتاح.

وفي النهاية العلامات دي مش دايمًا بتكون صح أو أكيدة بنسبة 100% يعني، بس لو شفت أكتر من علامة في نفس الوقت مع الشخص اللي قدامك، فأنت محتاج تقوم تمشي بقي عشان ده غالبا إشارة إنه مش طايقك ولا مرتاح في قعدته معاك، فمهم تاخد بالك وتقيم اللي حواليك عشان ماتتخدعش في حد أو تديله أي مشاعر وترجع تندم بعد كده.