تطور مراحيض الحمام رحلة عبر الزمن
في عز الشتا بعد ما تدفى وخلاص تقعد في السرير بتحس إنك عايز تعمل بيبي فبتضايق إنك قايم من الدفى ده داخل الحمام اللي جنب أوضتك ب 5 6 متر.. بس أكيد فكرت في وقت من الأوقات قبل ما تنام أو وأنت مزنوق في الطريق أو أي موقف كان نفسك تدخل فيه الحمام كيف بدأت قعدة الحمام؟ وكيف بدأ الحمام أصلا من البداية يعني!
زمان قبل ما يكون فيه حمامات بالشكل اللي نعرفه دلوقتي الناس كانت بتستخدم طرق بدائية جدًا للتخلص من الفضلات.. وفي العصور القديمة البشر كانوا بيقضوا حاجتهم في أماكن مفتوحة زي الغابات أو الأنهار، وبعد كده بدأوا يحفروا حفر في الأرض عشان يتخلصوا منها.
في الحضارات القديمة كان ليها حلول مختلفة، يعني مثلًا الفراعنة كان عندهم أماكن خاصة في البيوت للأثرياء، كانت عبارة عن مقاعد حجرية فيها فتحات، وكانت الفضلات بتنزل في أواني فخارية كان بيتم التخلص منها يوميًا. أما الفقراء فكانوا بيستخدموا الحُفر البسيطة.
طيب بعد كل ده والمعاناة دي برضه إزاي بدأ الحمام.. فتعالى نقولك إزاي حسب ما قال موقع “Science Museum” وموقع “”Smithsonian Magazine” في أحد مقالاتهم:
1- أول محاولات لصنع المراحيض في العالم
حضارة السومريين حوالي 3000 ق.م: كانوا من أوائل الناس اللي صمموا نوع بدائي من الحمامات جوا البيوت وكانوا بيستخدموا أواني فخارية أو قنوات صغيرة لتصريف الفضلات
حضارة وادي السند حوالي 2500 ق.م: كان عندهم البيوت بتحتوي على نوع من المراحيض المبنية بالطوب المحروق، وكانت الفضلات بتتخلص منها في نظام تصريف بدائي.
الرومان والإغريق من 500 ق.م لـ 400 م: الرومان كانوا متقدمين جدًا في موضوع الحمامات، وكان عندهم مراحيض عامة فيها مقاعد حجرية والناس كانوا بيقعدوا جنب بعض بدون حواجز وده كان عادي وقتها وحاول ماتتخيلش يعني، والفضلات كانت بتتصرف في قنوات مائية بتاخدها للأنهار.
2- العصور الوسطى:
بعد سقوط الإمبراطورية الرومانية بقى أوروبا دخلت في العصور الوسطى وهنا حصلت كارثة صحية لأن المدن مابقتش تهتم بنظافة الشوارع والناس رجعت تستخدم الطرق البدائية للتخلص من الفضلات زي إنها ترميها في الشوارع أو في النهر.. وده كان سبب رئيسي في انتشار الأمراض زي الطاعون والكوليرا.
3- العصر الحديث وده كان أول اختراع للتواليت الحديث:
سنة 1596 الإنجليزي جون هارينجتون اخترع أول تواليت فيه نظام لطرد المياه بعد الاستخدام، بس الفكرة ماانتشرتش وقتها لأنه كان اختراع غريب وماكانش عملي خالص.
وفي سنة 1775 البريطاني ألكسندر كامينغ اخترع نظام الصرف الصحي اللي بيمنع رجوع الروائح الكريهة باستخدام أنبوب على شكل حرف (S)، وده كان بداية التواليتات الحديثة بقى.
وفي سنة 1860 البريطاني برضه توماس كرايبر طور تصميم التواليت بحيث بقى فيه خزان مياه بيتم تفريغه لما تسحب السلسلة، وده الاختراع اللي انتشر في كل العالم وبقى الأساس للتواليتات اللي عندنا دلوقتي.
4- اكتشاف نظام الصرف الصحي:
أول محاولات الصرف الصحي بدأت في الحضارات القديمة زي الرومان والمصريين، بس بعد انهيار الحضارات دي، الدنيا رجعت تتدهور لحد ما بدأ تطوير أنظمة حديثة للصرف الصحي في القرن الـ 19، في لندن مثلًا حصلت أزمة اسمها “الرائحة الكبيرة” سنة 1858 لما نهر التايمز اتلوث بالفضلات وانتشرت الروائح والأمراض، فقرروا يبنوا نظام صرف صحي متكامل تحت الأرض، وده كان بداية التطور الحديث اللي بنشوفه النهارده.
5- التواليت في العصر الحديث:
دلوقتي، التواليت بقى عنصر أساسي في حياتنا، واتطورت أنظمته عشان تبقى صديقة للبيئة، وتستهلك مياه أقل، وكمان بقت فيه تواليتات ذكية بتستخدم تقنيات متقدمة زي التدفئة، والتنظيف التلقائي، زراير تحكم إلكترونية.
وأخيرًأ وأنت داخل الحمام المرة الجايه حاول تفتكر الرحلة الطويلة اللي عدى بيها عشان يبقى عندك كل مميزات الراحة والنضافة دي وتحمد ربنا إنك بتقوم من الدفى وتمشي حتة صغيرة أوي للحمام وترجع تتدفى تاني
ليست هناك تعليقات:
إرسال تعليق