بين شطين وميه - منتديات غزل وحنين

بين شطين وميه - منتديات غزل وحنين

بين شطين وميه
أحلامنا رايحه جايه

تاخدنا الفرحه مره ...
نعيش الحزن دنيا

تبان الضحكه حلوه
تموت جوانا غنوه

تداوي القلب بسمه
يروح العمر ف ثانيه

وان جينا نقول نحب
ونعيش بدقة قلب

يصرخ جوانا رعب
من لحظة جرح تانيه

تفتكروا ايه الحل
في قلب تاه وضل

يحب تاني والا
كفايه جراح وذل

ان جيتوا للحقيقه
العمر يادوب دقيقه

يانعيشه بكل حب
بأحلام حلوه بريئه

يانسيبه ومانشيلش ذنب
ونار نقيدها حريقه

يا قلبي هتحب والا
شايف نهارك ليل

الصدق غاب وولى
والحزن مالوش بديل

هتتوه وتجيلي ضايع
وتدوق في حبه الويل

تندم وتقول لي راجع
اقولك وايه الدليل

تبكي بدموع عينيك
توصفلي طريق طويل

مشيته وأنا بين ايديك
وخدعنا طيف جميل

أندهلك تعالى يللا
تقول لي استني بس

أقول جرحك ما خلى
تقول لي بشوقي حس

أقول لك بلاش أوهام
تقول لي يااا سلااام

أقول لك صدقني ارجع
تقول لي كفاياكي هس

وتهت يا ناس خلاص
بين قلبي وبين احساس

أقول دا مش نصيبي
يقول من زمان حبيبي

لو سألتوا في يوم و جيتوا
هقول من زمان حبيته

وافتكرني في يوم نسيته
اللي قلبه قمر وشمس

يا قلب يا حيران
وبتنده على حب زمان

هنتوه تاني في حياتنا
وترجعلي كمان خسران

أقول لك دا مش نصيبنا
تقول لي أنا الغلطان

و أرجع من تاني اطيب
في جرحك الكبير

تقول لي دا قلبه طيب
وأنا في حبه أسير

صدقني لو قلبه قريب
وبيخاف عليك كتير

دا ظني عمره ما خيب
دي شفقه و طيبة ضمير

فوق يا قلبي يللا
وارمي ف بحرك همومك

دي الموجه تنزل وتعلى
وفي الدنيا مين يصونك ؟!

بقلمي / ام اياد