ديوان المسحراتى لعمر الصاوى.....المنجد
المنجد
مسحراتى فى البلد ومنَجِّد
وكل ليله كإنى نازل أعيد
إنده معايا وقول يا شيخ سيد
يا رب دايما نيجى فى الأفراح
زغروطه ياام الحبيبه
قولى دايمًا يا رب
مع كل دقة وتر
سمعت دقة قلب
قلبين بيتجمَّعوا علــــى الحلال والحب
يا عم يا منجد
شد الخيوط فى الالحفة وشدّد
ما تخلّى واحد منِّنا يبْعد
يا عم يا منجد
بحق شهر الصيام
تملا المخده البيضا بالأحلام
وتحشى كل الالحفه
عشره ومحبه ودفا
أصل الوفا فى النفوس
بسم الله واضرب بالوتر والقوس
خلي الفراق يبعد..
يا عم يا منجد
بالإبره طرّز فى الشِّلَتْ والملايه
بسم الله واقرا السوره والآيه
ما تخلى عين الحاسِدِين تحسد
يا عم يا منجد
زمن البعاد عَدّى
ارسم لنا ع المخده
يمامه بيضا وورده
والْضُم قلوبنا بخيط حِنَيِّن واعقِد
يا عم يا منجد
وارسم على الخُدَدِيه
مِ الناحيه دِيه.. للناحيه ديه
غزاله نازله على نبع الحنان تِوْرد
يا عم يا منجد
واعمل مساند للكنب
خضرا فى لون ورق العنب
لما نخطى مْنِ العتب
تصبح جنينه تضمنا وتسعِد
يا عم يا منجد
وتَكَّايات ..
لما الحبيب يتّكى
ما تقولش آه .. ولا تشتكى
يا قطن يا ابيض ياللى إسمك قطن
علشان خدوك الفلاحين بالحضن
يا كل خيط نوّر لنا فى بيتنا
على قد ما حبينا ..حبيتنا
دى حاجات فرحنا لما تيجى وتِقْدَم
ـ ربنا يعلم ـ
تصعب علينا لما تتجدد
يا عم يا منجد
بالطبله دقه وبقلبى دقه
ياللى سامعنى ما تقولش لأ
كل اللى جوزتهم راجع أسحرهم
ع الحب نيمْتُهم بالحب اسهرهم
قلبين ما يتغيروا. طبع الوداد غالب
وانا اللى طالب من الرحمن يكترهم
اصحى يا نايم
رمضان كريم
ليست هناك تعليقات:
إرسال تعليق