ديوان المسحراتى لعمر الصاوى....بيت الحبايب

بيت الحبايب
مسحراتى نازل الوراق
بلد الحبايب والنسيم المعطر
أنا، عن هواها، ما عشت لحظة فراق
وفْى قلبى شايل زرعها الأخضر
يا ألف رحمه يا شيخ محمد يا ابْحَر
في الجنه شايفك ماشى بتسحّر
دمع الحنان فى عينيك
واحنا قلوب حواليك
بنصلي فوق السندس الأخضر
قِيد الكُلُبَّات اللى فى الشبابيك
الله ينوّر عليك.. الـمَنْدَرَه بتعْمر
وتدوْر علينا القرفه والسكر
والله زمان رمضان كريم يا جدى
والتمر فى المنديل تطلع وتدى
وتقول لأمى: يا بنتى سمّى قبل ما تعِدى
تفرش لنا شالَك على المصطبه
أهلاً وسهلاً مرحبا
نظرة عينيك أحنّ مِ الطبطبه
وأحن من قولة: سلامتك يا ابنى
أشم ريحة ريحانك وانت بتقرّبنى
وتقوللى حِمل الحبايب عمره ما تعبنى
صلوا على طه رسول المحبه
فى الأرض خير
ولاّ دا خير فى القلب
يطير عليك الطير
ينزل يلقّط من ايديك الحَب
تعب السنين فى الحُب يتقضّى
يا فجر طالع ع البيوت والغيطان
والوز نازل في القَنا يتوضا
الوز نازل فى القنا عطشان
يشرب ويرفع راسه للسموات
منقاره بيتمتم مع الدعوات
يا ريحة البركات يا بيت الحبايب
أنا ليا فيكى من الوداد نايب
ومهما كنت بعيد ..
عمرى ما اكون غايب
ولا عمرى أنسى التوته والعنبه
ومصَلى مفروشه على الكنبه
وصينيه القلل اللي فى الشباك
فيها اللمون بيعطر النسمه
وباب كبير
فاتح جناحه للبشر و الطير
والنسمه تدخل والمفارش تطير
والقهوه جيه على الصينيه النحاس
رايحه لكل الناس
فناجيل فى بُقّ الطيبين تنباس
يا طيب الإحساس ما بين الصُّحبه
يا مسحراتى ياللى شايل قِرْبه
تسقى العطاشى على بيبان الأحبه
وانْ يسألوك عن الدعا فى الفجر
قُلْ لا أسألُكُم عَلَيه من أجرْ
إلا الموَدَّةَ فى القُرْبَى
بالطبله دقه وبقلبى دقه
ياللى سامعنى ما تقولش لأ
يا ليل جميل تسحرنى أوقاته
الفجر يظبط ع القلوب دقاته
ومع النسيم يبعت لنا ابتساماته
وكل طير بينادى لاخواته:
اصحى يا نايم
رمضان كريم