النجار
مسحراتى وصنعتى نجار
لحَمت قلبى بحبكم وهواكم
أما الخشب..
باللزق والمسمار
عاشق ومعشوق: الغنا والأمل
وضرفتين شباك ما بينهم غزل
والنسمه رايحه لحد سابع جار
ودولاب تنام فيه الهدوم
بيضا وخاليه من الهموم
تقول عسل وانغسل
تلقى المشابك علي سطوح الغسيل
سهرانه تتوَدْوِد.. وطول الليل
تتحاكى عن عرق الغرام والعمل
الحب يجْمعنا على الطبليه
زى ابتسامة سماح على كنبه بحريه
اللقمه بين اتنين
والضحكه بين اتنين
يا عين ورَدّ الباب على ايديا
عمرى فى يوم ما نسيت مواعيدى
يا باب حبايبى لو نسيت إيدى
حيفكرك شوقى اللى فى عينيا
…. …. …. …. ….
ضرب القادوم. الخشبه قالت: أى
ضربت تانى. الخشبه قالت: حى
ضربت تالت. شع منها الضى
وقالت لى: بسم الله
أنا كنت شجرة توت
البعض منى يعملوه مركب
بين الرياح والموج بيتقلّب
والبعض منى يعملوه ساقيه
طول الليالى تدور وتسقى الحى
والبعض منى سطح فوق البيوت
بالطبله دقه وبقلبى دقه
ياللى سامعنى ما تقولش لأ
في حبكم أنا قلبى ينسى جراحه
كما باب جديد وسعيد بمفتاحه
عملت قلبى دولاب وكنبه وسرير
لجل الحبايب يفرشوا ويرتاحوا
اصحى يا نايم
رمضان كريم
ليست هناك تعليقات:
إرسال تعليق