اللهم صلِّ وسلم على نبينا محمد
انهاردة اكتشفت حاجة .. اكتشفت ان احنا كمصريين عندنا لغة بنستخدمها مابينا ومابين بعض " بالصلاة على النبي " ❤️
يعني مثلا الناس اللي واقفة في الشارع اللي بتبيع حاجات تلاقيه بيقول " بالصلاة على النبي " بخمسة جنيه ، وينادي على الحاجة اللي بيبعها " بالصلاة على النبي " ❤️
كمان لما تيجي تفتح موضوع او تيجي تشرح لحد حاجة اول حاجة بتبدأ بيها بتقولوا اي طب ياعم " صلي على النبي " ❤️
وتبدأ تتكلم في الموضوع اللي عايز تتكلم فيه
ولما مثلا بيكون في خنا.قة واتنين بيشد.وا مع بعض تلاقي حد داخل بيقول يجماعة اهدوا " صلوا على النبي "
تلاقي الخناقة خلصت خلاص او بدأت تهدى ❤️
ولما بنلاقي حاجة حلوة جدا ومش عارفين مثلا نشرح او نوصف جمالها بنقول اي الحلاوة دي " اللهم صلي على النبي " ❤️
ولو حد جيه بصلك في حاجة بتاعتك وانت مثلا خايف عليها تتحسد ومذكرش ربنا ولا قال حاجة
تقولوا يعم " صلي على النبي " في قلبك في اي 😂❤️
حتى من واحنا صغيرين لما كان حد ييجي يحكيلنا حدوتة قبل النوم
تلاقيه بيقول في بداية الكلام اي
كان ياما كان ياسعد يا إكرام وما يحلى الكلام إلا بذكر النبي عليه الصلاة والسلام ❤️
ف احنا عندنا لغة بنستخدمها " بالصلاة على النبي " وهي احلى لغة في الدنيا ❤️
ليست هناك تعليقات:
إرسال تعليق