5 أسباب هتقنعك تسامح اللي أذوك عشان ده أحسن ليك

 

 

 

ممكن نبقى أذينا ناس كتير من غير ما ناخد بالنا وممكن وإحنا واخدين بالنا والعكس برضه ممكن تبقى ناس كتير أذتنا بتصرفات مابتتنسيش وحاجات زي الخيانة وعدم الاهتمام والتنمر والابتزاز وغيرهم من المشاكل اللي بتتعبنا سنين وسنين.

معظمنا بيواجه أساءات كتير في حياته ومعروف إن الشاطر هو اللي بيسامح ويكمل طريقه ويتعلم من الدروس المستفادة من القصة سواء قدر ينسى أو لا، بس خلينا متفقين إن السماح والغفران ده شئ صعب مش سهل أبدا ولكن هو أحسن الحلول لصحتك النفسية ومستقبلك.

موقع “psychologytoday” قال 5 أسباب محتاج تسامح الناس عشانهم وهما:

1- لما بتسامح حد فأنت بتسامح نفسك:

الجملة تبان جملة لطيفة وصغيرة بس هي  حقيقية، لإن الحقد على شخص جرحك مش مقتصر بس على اللي هو عمله فيك، أنت كمان مسؤول عن إنك سبتله مساحة عشان يجرحك، في بعض الأوقات ممكن ماتبقاش فاهم فعلا إنه كان بيأذيك لإنك مش عارف لما الشخص بيتضايق أو بيغير أو بيغضب منك ممكن يعمل إيه لحد ما بيجي الوقت اللي بيأذيك فيه وبتظهر كل حاجة على حقيقتها.

فأنت محتاج تسامح نفسك عشان ماكنتش فاهم ولا كنت عارف الشخص على حقيقته وماتلومش نفسك إنك ماوقفتش الشر ده إنه يأذيك، لما بتسامح نفسك فأنت بتستبدل الكره والاستياء والأذى بالسلام، وخليك عارف إنك بتعمل حاجة مفيدة لحياتك وراحتك.

2- المسامحة بتخرجك من دور الضحية:

المسامحة بتخرجك من دور الضحية، وبتخليك تكسر الروابط السلبية اللي بتربطك بالشخص التاني، وممكن تسامح على فكرة من غير ما تنسى، وتعرف إن اللي حصل حصل ومش لازم تمثل إن كل حاجة كويسة أو رجعت لطبيعتها، عادي ممكن تسامح حد وتختار إنك ماتعرفش الشخص ده تاني، هيبقى اختيارك برضه في الأول والأخر بعد ما تسامحه وده هيبقى على حسب أنت قادر تثق في الشخص ده تاني ولا لا ووقتها هتبقى أنت المتحكم وماسبتش نفسك لدور الضحية ومابقيش الطاقة السلبيىة ولا إنك شخص مغلوب على أمره ده اللي متحكم فيك، فأنت بعد ما تسامح وتغفر هتقدر تركز إنك تبقى شخصية أقوي ومش هتسمح أبدا لنفسك إن تقع في موقف شبه اللي حصل قبل كده.

3- المسامحة بتخليك حر:

الغفران بيسمحلك تستعيد طاقتك تاني زي مثلا الطاقة العاطفية اللي بتبقى استثمرتها في شخص أو في موقف معين، لإنك بعد ما بتسامح بتبقى شخص حر وتقدر تنقل على الصفحة اللي بعدها وتدخل في مواقف جديدة مع أشخاص أو حاجات تانية إيجابية عشان تكبر وتنضج أكتر وتبقى ليها تأثير إيجابي على صحتك العاطفية والنفسية والجسدية.

خصوصا كمان إن الشخص اللي مابيسمحش بيفضل مقيد بحاجة أو شخص بيستنزف طاقته وبياخد منه حياته، والحرية دي هتسمحلك تشوف الأشخاص أو المواقف اللي مضايقك بشكل مختلف.

4- المسامحة بتساعد صحتك تبقى أحسن:

المشاعر السلبية بتسلب طاقتك وبتأثر بالسلب على جسمك وعقلك وروحك، وبتسبب الغضب والقلق والاكتئاب والتوتر غير المبرر وده بيأثر تأثير سلبي على جسمك، وبيسبب أمراض زي الضغط العالي وارتفاع معدل ضربات القلب والإحساس بالخروج عن السيطرة.

فممكن الضغط اللي أنت بتحط نفسك فيه من عدم المسامحة في موقف أو عدم مسامحة شخص لسلسلة كاملة من ردود الأفعال الجسدية لإن وجود شخص في حياتك أنت مهتم بيه وأنتوا على خلاف سوا شئ غير مريح خالص، فإحساس إنك تسامح هو عامل زي ما تبقى رافع وزن تقيل في الجيم كده وبعد كده تنزله على الأرض فتلاقي نفسك بتاخد نفسك أو زي ما بيقولوا بتتنفس الصعداء.

5- المسامحة بتساعد إنك تتواصل مع الناس:

الغفران والسماح بيشجع على الرحمة وبتخليك قادر تتواصل مع الناس تاني كجزء من إنك عديت بتجربة إنسانية وبتحس بالناس زي ما حسيت بنفسك قبل كده، لكن أهم حاجة إنك ترمي الماضي ورا ضهرك، وتسامح لإن التسامح يعتبر من أعمال الخير وبداية طريق السلام اللي كلنا محتاجينه عشان نعيش.