أنواع الناس في قعدات يوم الوقفة: المتنح والمهيبر والنكدي

 

ليلة العيد معروفة في مصر إنها ليلة نسبية جدا كل واحد بيقضيها حسب ميوله ورغباته، اللي قاعد مع أهله واللي خارج في مكان بيحبه مع صحابه، واللي متجمع مع صحابه في بيت، ومحتاجين نركز شوية على اللي متجمع مع صحابه في بيت دي، لإن غالبا القعدة مابتكونش صافية مش متجمعين عشان يلعبوا بولة “ستميشن”.

أغلب الاصحاب اللي بيتجمعوا مع بعض يوم الوقفة أو ليلة العيد لازم يخربوها بشكل ما، أيا كان نوع الخربان ده سواء قانوني أو غير قانوني.. احتفالا بليلة العيد جمعنا أنواع الصحاب في قعدة الحشيش أو الشرب عموما وهما:

1- المتنح:

وده اللي أول ما بيشرب أي نوع بيسطل وبيفضل متنح لكل اللي قاعدين أو بيفتح موبايله وبيفضل متنح و”يسكرول داون” بس.

2- الرغاي: 

وده الشخص اللي بتقلب معاه برغي وبيصدع كل اللي في القعدة بحكايات تخصه هو وبس واللي غالبا بيبقى محدش مهتم يسمعها أو بيبقوا متضايقين منه إلا لو فيه واحد تاني في القعده شبهه هيندمجوا أوي مع بعض.

3- اللي بيتسحل في أي حاجة:

ده النوع اللي غالبا بيمسك ريموت التلفزيون وبيبدأ يقلب في كل القنوات لحد ما يلاقي ناشونال جيوجرافيك ويتفرج على سمكة التونة العنيدة أو بيتسحل في “بابجي” مثلا.

4- اللي بتقلب معاه بصراحة:

ده الشخص اللي في الغالب مابيتكلمش في العادي كتير وأول ما بيشرب بيعك الدنيا ويفضل يعك ويقول كلام ماينفعش يتقال

5- المهيبر:

فيه واحد كده هتقلب معاه إنه عايز يسمع أغاني أو هو بنفسه اللي يغني أو يرقص، ماتحاولش تهديه عشان كل ما تهديه هيهيبر أكتر.

6- الجعان:

فيه شخص في القعدة كل اللي هيعمله إنه يقوم يدور على أكل وياكل لو مالقاش هيقوم يطلب أكل ويستني الأكل ييجي وياكل، ماتقلقش منه مش هياكل دراعك هو كل اللي عايزة نص فرخة وإزازة مياه بس.

7- اللي بينام:

شايف كل أنواع الناس دي هو ولا واحد منهم، هو هيشرب ودماغه هتتقل وهيدور على أقرب سرير ومش هيقوم من النوم غير الصبح.

8- اللي بيشتم صحابه:

الشخص ده زيه زي المهيبر أو اللي بتقلب معاه بصراحه، فبيبدأ يتكلم بصراحة بس بتقلب معاه بوقاحة ومن هنا بتيجي الشتايم أو إنه يغلط في اللي قاعدين معاه وبالتالي بتحصل مشاكل كتير بسبب الشخص ده.

9- اللي بتقلب معاه بنكد:

فيه حد من صحابكوا بيبقي مصدوم عاطفيا أو الدنيا جايه عليه هو ده الشخص اللي بيبقى عايز يشرب أصلا، وأول ما يشرب يا هتلاقوا مأسورة نكد واتفتحت في الكلام أو عياط ونكد برضه وهيفصل كل اللي قاعدين.

10- الموهوم إنه تعبان:

غالبا هيبقى فيه واحد موهوم وهيخاف جدا على نفسه ولو حس إن نبضات قلبه زادت شوية هيفضل يقول إنه تعبان وحد يجيبله حاجة ياكلها أو يشربها وده لإنه هو مبتدئ وممكن يبقى أول مرة يجرب.

11- اللي بيكلم الإكس:

فيه حد برضه نكدي جدا أول ما يخرج عن وعيه بيفتكر جراحه العاطفية وفي ثانية بتلاقيه اتهور وكلمة الإكس اللي هي ممكن تبقى خلفت دلوقتي أدهم وجودي بس هي هفت عليه ومش هياخد رأي حد هو هيكلمها ويعمل فيها الفنان هاني سلامة في فيلم السلم والتعبان.

12- اللي بيفكر في أسئلة وجودية: 

وده اللي بتقلب معاه بأسئلة زي بتاعت كيف بدأ الخلق؟ وإزاي الديناصورات انقرضت؟ ويبدأ يتناقش في نظرية دارون والتطور وتقسيم الأرض جغرافيا، محدش بيبقى مهتم به ولا بكلامه ولو اديته نص ساعة هينام لوحده.

13- اللي بيتعب بجد:

بيبقى عنده أفكار وانطباعات مجهولة المصدر عن إنه شبح جدا، وبيأفور وفي الآخر ده الشخص اللي بيقلبها نكد على الكل بجد وبتبقى ساعات من الدراما لحد ما حد يجيبله طبق مخلل أو شيبسي خل وملح أو كوباية قهوة يعني.