لو عايز يبقى عندك روتين صباحي.. دي 10 حاجات ممكن تساعدك

 

لو عايز يبقى عندك روتين صباحي.. دي 10 حاجات ممكن تساعدك

 

ناس كتير نفسها تبقى “شخص صباحي” أو Morning Person وبيحاولوا يدوروا على حاجات يعملوها الصبح أول ما يصحوا من النوم، بمعنى إن يبقى عندهم Morning Routine.. وصناع محتوى كتير على السوشيال ميديا، بدأوا يشاركوا Vlogs للروتين الصباحي بتاعهم، والناس بتشوفه وبتتفاعل معاهم وبيحسوا إن هم كمان عايزين يبقى ليهم روتين يعملوه الصبح قبل زحمة الدراسة أو الشغل أو المشاوير.

الروتين الصباحي فايدته إنه بيظبطلك باقي اليوم، وبتحس إن يومك فيه انتاجية، وناس كتير اتكلمت على إنه بيظبط مودك ومزاجك لأنك بدل ما تصحى من النوم تجري على الجامعة أو الشغل، بتدي لنفسك شوية وقت عشان تعمل حاجات لنفسك تعلي من إنتاجيتك وتحسّن من شعورك العام.

إحنا جمعنالك شوية حاجات مهمة وسهلة ممكن تحطها في روتينك الصباحي، ومواقع كتير اتكلمت عنها زي Asana و CNN و Self:

1- الصحيان بدري: والنصيحة دي تبان بديهية بس أنت هتحتاج تصحى بدري عن الميعاد اللي متعود تصحى فيه عشان يبقى عندك وقت تعمل فيه الروتين الصباحي بتاعك.. وغالبا هتحتاج تصحى بدري عن ميعادك من ساعة ونص لساعتين.

2- اشرب مياه أول ما تصحى: جسمك بيبقى فيه جفاف من فترة النوم، فأفيد حاجة تبدأ بيها يومك إنك تشرب مياه أول ما تصحى.

3- إعمل شوية تمارين رياضية: سواء في البيت أو لو عندك القدرة إنك تروح الجيم.. التمارين الرياضية الصبح من أكتر الحاجات اللي هتفيدك وهتساعدك إنك تفوق وتصحصح وتحس بنشاط طول اليوم بسبب ضخ الدم في الجسم وإفراز الإندورفين اللي بيحسن المزاج.. ولو مش متعود ممكن تبدأ بـ 10 دقايق بس في الأول.

4- دش ساقع بعد التمارين: أغلب الخبراء بينصحوا بـ دش بارد بعد الجيم أو الرياضة إستكمالا لوصلة النشاط والصحصحة.

5- افطر فطار صحي: أغلب دكاترة التغذية بيقولوا إن الفطار أهم وجبة في اليوم لأنها هي اللي هتساعدك تركز وتستعد للسحلة اللي في يومك.. وموقع Healthline كان ناشر مقالة فيها اقتراحات لفطار صحي ممكن تساعدك لو محتار.

6- التأمل: من أكتر الحاجات اللي الخبراء بينصحوا بيها هو إنك تدي لنفسك شوية وقت الصبح إنك تتنفس.. حتى لو 5 دقايق بس.. مجرد إنك تركز في التنفس بس ده هيقلل معدلات التوتر والقلق عندك وهيزود التركيز عندك.

7- الـ Morning Pages: ودي عبارة عن تكنيك كتابة إنك تطلع كل الأفكار والدوشة واللخبطة والمشاعر اللي جواك على ورق الصبح.. من غير ما تركز في خطك أو في النحو أو في الإملاء.. وتكتب أي حاجة عايز تكتبها من غير ما تفكر تاني في اللي هتكتبه ومش لازم ترجع تقرأه.. ولو قلقان إن مشاعرك دي ممكن حد يقرأها، خبي الورق أو إرميه.. فايدة التمرين ده إنه بيزود الإنتاجية والإبداع وبيقلل التوتر وبيساعد على تنظيم الأفكار والمشاعر.. 

8- اكتب اللي وراك النهاردة أو إعمل To Do List: وده على قد ما هو بسيط بس هينظملك يومك وهيساعدك لو انت شخص بتنسى وهيخليك تعرف إيه اللي وراك والمفروض تدي أولوية لإيه وهيساعدك تنظم يومك كله.

9- تمرين الامتنان: وده هدفه إنه يزود الطاقة الإيجابية عندك في بداية اليوم وهو بمنتهى البساطة إنك تكتب أو تقول لنفسك أكتر حاجات إنت ممتنلها النهاردة أو أكتر حاجات بتحبها في نفسك أو أكتر حاجات فخور بيها أو أي حاجة محسساك بالامتنان حتى لو حاجة بالنسبالك بسيطة أو صغيرة.

10- إعمل أي حاجة بتحبها: لو بتحب الكافيين، إشرب قهوة أو شاي.. لو بتحب الموسيقى، شغل تراكات رايقة.. اسمع أي بودكاست بتحبه.. عندك هواية معينة ممكن تديلها كام دقيقة الصبح قبل ما تنزل.. ممكن تقرأ شوية لو بتحب القراءة.. إعمل أي حاجة بتحبها حتى لو حاجة بسيطة جدا.

كل دي عادات ممكن تعملها في روتينك الصباحي.. سواء حابب تعملهم كلهم سوا أو حاجات معينة منهم بس.. أهم حاجة إنك تطوّر روتينك اللي يحسسك بالسعادة وإنك تبقى باديء يومك بالشكل اللي يريحك ويناسبك.