فوايد ماتعرفهاش عن ترتيب سريرك

 

أغلب أمهاتنا بينصحونا يوميًا إن إحنا نرتب سريرنا أول ما نصحى من النوم.. وترويق السرير أو ترتيبه طلع له فوايد كتير ومهمة جدا، وخصوصا على المستوى النفسي.

 

مواقع كتير نشرت مقالات ودراسات مختلفة عن فوايد ترتيب السرير زي VeryWellMind و BetterSleep ومواقع تانية كتير..

 

1- ترتيب السرير بيقلل التوتر، لأن الفوضى وعدم النظام والعشوائية في البيت أو في أوضتك غالبا هتزود التوتر عندك، فلما سريرك يكون مترتب ده هيساعدك على تقليل معدلات التوتر عندك.

 

2- السرير هو أكتر حاجة بتخلي شكل الأوضة جميل أو لأ.. فـ لو عايز تروّق أوضتك، أول وأسهل حاجة ممكن تبدأ بيها هي ترتيب السرير.

 

3- لما هترتب السرير الصبح، ده هيخليك مبسوط ومرتاح أكتر وأنت داخل تنام بالليل.. وده هيساعدك على النوم أحسن.

 

4- ترتيب السرير من النضافة الشخصية.. لأنك كل ما بترتب السرير وبتنضفه ده بيمنع تجمع البكتيريا والتراب وحشرات الفراش، وبالتالي ده بينعكس إيجابيًا على صحتك الشخصية.

 

5- أغلب الخبراء بينصحوا بترتيب السرير لو عايز تبدأ يومك بإحساس من الإنجاز، لأنه مهما كان في نظرك إنجاز تافه أو صغير، بس أنت بدأت يومك بأنك عملت حاجة كويسة، وحاجة لنفسك.

 

6- السرير وهو مترتب أو متروّق بيدي شعور عام بالراحة والاسترخاء والهدوء.

 

7- ترتيب السرير، مهما كان حاجة تبان سهلة أو بسيطة، بس هو بينعكس إيجابيا على نفسيتك، لأنك لو قاعد في بيئة مش منظمة أو مش نضيفة ده بيخليك تحس بشعور بعدم الراحة والتوتر وبتحس إن الدنيا متلخبطة

 

8- غالبا لو السرير مش مترتب فأنت هتبدأ في عدم الاهتمام بباقي الحاجات، زي إنك ممكن ترمي هدومك عادي في أي حتة وتسيب حاجات مش نضيفة، ومكتبك يبقى يضرب يقلب.. لكن على العكس لو رتبت السرير، ده بيخلق شعور عندك إنك عايز تروّق أو ترتب باقي الحاجات، زي لبسك ومكتبك وأوضتك بشكل عام.

 

9- ترتيب السرير بيحسن الموود أو المزاج بشكل عام.. أغلبنا بتتأثر نفسيته بالحاجة اللي بيشوفها.. فأنت لو شايف قدامك بيئة نضيفة ومترتبة وحلوة، مودك هيبقى بشكل مختلف تماما عن لو كل اللي شايفه عدم نضافة وعشوائية وفوضى.

 

أنت لسه قاعد بتقرأ الموضوع؟ قوم رتب سريرك بسرعة مفيش وقت للتفسير!