عندك امتحانات أو مذاكرة ومش عارف إزاي تنظم وقتك في رمضان؟ مش لوحدك على فكرة دي مشكلة ناس كتير أوي فتعالى نشوف شوية نصايح و تركات تساعدك على المذاكرة شوية في رمضان
1- النوم الكفاية :
أول حاجه لازم نبدأ بيها هي إننا نظبط نومنا.. أول ما هتقرأ الجملة دي طبيعي هتخاف شويه وهتحس
إنك ممكن ماتعرفش تعمل ده أو عشان بتحب تنام كتير وتريح بس ماتخافش ده مش هيأثر على راحتك أو نومك.. علشان كده الأفضل هو إنك تنام وترتاح لوقت كافي مش كتير أوي ولا قليل أوي وممكن تقسم الوقت ده علي بليل وكمان قبل الفطار لو حسيت إنك لسه مانمتش كويس
طيب إزاي ده هيفيدك في المذاكرة؟ تعالي نجاوبك عليه:
النوم الكفاية بيزود نسبة التركيز والتحصيل بتاعك، وكمان لما تنام بتدي فرصه لمخك ينظم الحاجات اللي اتعلمتها خلال اليوم ده غير إنه يبني ذكريات تفكرك بكل حاجه عملتها او ذاكرتها خلال اليوم.
2- الأكل:
تاني حاجة هنتكلم عنها هي الحاجة اللي كلنا بنحب نعملها في رمضان، وهي إننا ناكل وناخد كفايتنا في الأكل وزيادة كمان وده مش بس في الفطار لاء ده كمان في الحلويات اللي بعد الفطار والسحور برضه أصل ماينفعش ننام جعانين برضه
بس لو ركزت شويه هتلاقي إنك لو كلت بطريقة غير منظمة هتحس إنك تقلان ومش قادر تعمل حاجة وده تفسيره إن جزء كبير من طاقة الجسم بتتجه ناحية إنه يهضم الأكل، وده هيقلل قدرتك على التركيز لمدة طويلة حتى بعد الأكل بكذا ساعه؛ علشان كده الأفضل إنك تنظم أكلك باعتدال وعلى فترات بعد الفطار علشان تعرف تركز وكمان ماتخليش في نفسك حاجه.
وبعد كده هيجي وقت السحور وده لازم تركز أوي في الحاجات اللي هتأكلها فيه علشان مهم تدي لجسمك ومخك الأكل والطاقة اللازمة عشان يكون قادر يستوعب ويركز طول اليوم
و الأكلات دي زي:
البروتينات الكربوهيدرات المركبة زي (البيض والجبن والفول والزبادي والفاكهة وخاصة التفاح و المكسرات) وده علشان الأكلات دي الجسم بيهضمها ببطء فبتديك طاقة أكبر على مدار اليوم علشان لو عايز تذاكر أو حتى تخلص حاجات تاني وراك من غير ماتحس إنك تعبان أو إنك بتضيع اليوم و الوقت.
3-احسن وقت للمذاكرة في رمضان:
أحسن وقت ممكن تذاكر فيه في شهر رمضان واللي ممكن تاخد منه أكبر استفادة هو الوقت اللي بيكون بعد الفطار بساعتين.. علشان ده أحسن وأكتر وقت ممكن تكون نسبة تركيزك فيه عالية.. أما بعد الفطار على طول هيكون وقت الهضم وده هيحسسك بخمول علشان المعدة ساعات بتطلب مساعدة من المخ والأعضاء إنهم يساعدوها في عملية الهضم فمش هيكون عندك الطاقه الكافية للتركيز زي بعد الفطار بساعتين مثلا.
وعلشان تركز بقى في المذاكرة أكتر فيه شويه نصايح وحاجات تاخد بالك منها:
دور على مكان هادئ تذاكر فيه
كل شويه غير المكان اللي بتذاكر فيه علشان ماتزهقش
اقرأ وسمع لنفسك اللي بتعمله بصوت عالي
شجع نفسك بمكافأت صغيرة كل شويه (ممكن تكون حلقة مسلسل أو أكلة بتحبها)
ماتأجلش حاجات وراك بحجه إنها صعبة خلصها الاول وأنت فايق ومركز وهيبقي فاضلك السهل يخلص في الأخر.
ليست هناك تعليقات:
إرسال تعليق