عفويات.....صحيت من نومى فجأة بقلم عادل عوف
صحيت من نومى فجأة
علي صوت بيقول دي سرقة
و مالقتنيش معايا
مع إني كل يوم
بسد واكون خدوم
وأقدم لي الهدايا
وأقعد أسمعني وأصغي
واضحك ويايا و أرغي.
و اواعد ياما و ألغي
لو بصيت في المرايا ولقيت الوش مرهق
وتحت عينيا هاله
افضي روحي فورا
واقول دي اكيد رساله
مبعوته مني ليا
علشان في حاجه فيا
محتاجه أفوق شويه
وأحقق العداله
لكن من فتره عايز
اقعد مع روحي أفضفض
وكل ما اقول و اصمم
اعند ويايا وارفض
لكن إصراري خدني
أحبسني بالوكالة
يومين
برغي و بـ اسمع
اضحك حبه و ادمع
و أطرح من خيبتي واجمع
ناس كانت كماله
و اجيب الحق مني
وحبه اجيبه منهم
وأقولي أنا مش عاجبني
واقول أنا مش عاجبهم
لكن من كتر هريي
بنهج وگ إني بجري
مع اني لسه واقف زي اللي المستني اجري
ولما تعبت نمت
و مأمن ليا كان
وصحيت من نومي فجأة
مالقتنيش في المكان
سارق قصصى و حكاياتي
وصورتي اللي في مرايتي
اللي بتضحك لي دايما
و معاهم الأمان
ليست هناك تعليقات:
إرسال تعليق