بسم الله،
تعالوا نشوف إيه هو الحد الأدنى لجدول الطاعات والنوافل في رمضان اللي هو -في ظني- يقدر عليه اللي لسة بيمشي في بداية طريقه لربنا، واللي مشغولة مع أطفالها، واللي بيقضي وقت طويل في شغله أو اللي عندهم مذاكرة وامتحانات.
1- قراءة القرآن: هتقرأ جزء واحد يوميًا عشان تختم مرة في الشهر، وعشان تسهل على نفسك المهمة ممكن تقسم قراءة الجزء على كذا مرة على مدار اليوم.
2- الذكر: حافظ على أذكار الصباح والمساء.
وخلي لسانك رطب على طول بكل أنواع الذكر التسبيح والتحميد والحوقلة وغيرهم لان الذكر من الاعمال السهلة جدا وأجرها عظيم جدا جدا وبتعوض التقصير اللي في النوافل التانية.
3- الدعاء: استمسك بوقتين للدعاء متفرطش فيهم قبل الإفطار وقبل الفجر.
قبل الافطار انت بتكون صاحي أصلا وقبل الفجر بتصحى عشان تتسحر.
4- الصدقة: صدقة يومية باللي تقدر عليه ولو كان أقل القليل ولو شق تمرة تتقي بيها النار.
5- صلاة القيام: صلاة ثمانية ركعات بقصار السور مع الشفع والوتر كلها مش هتزيد معاك عن 35 دقيقة.
وتقدر تقسمهم على الليل كله كمان فتصلي أربع ركعات بعد العشاء وتخلي الأربعة الباقيين مع الشفع والوتر لما تصحى للسحور.
أو اعمل التقسيم اللي يناسبك ويسهل الأمر عليك بأي شكل.
ولو مقدرتش على ثمانية ركعات مع الشفع والوتر خليهم أربع ركعات بقصار السور مع الشفع والوتر.
.
شوية ملاحظات:
1- أنا متكلمتش عن الاجتهاد في الحفاظ على الفروض وترك المعاصي لأنها أمور مفروغ منها.
2- وقتِك اللي بتقضيه في رعاية أطفالك، ووقتَك اللي في الشغل، ووقت المذاكرة دة مش وقت ضايع بالعكس دة ممكن يكون عليه حسنات كتير بإذن الله لو استحضرتم النوايا الطيبة للأعمال دي وغيرها زي أوقات النوم والأكل، طالما كان قضاء هذه الأوقات بغير إسراف على حساب العبادات في رمضان.
3- حاول بكل طريقة تزود من القربات والنوافل طالما تقدر لكن اجتهد إنك متنزلش عن المستوى دة.
والله المستعان.
ليست هناك تعليقات:
إرسال تعليق