أنا هبري سن القلم - منتديات غزل القلوب

أنا هبري سن القلم - منتديات غزل القلوب

أنا هبري سن القلم

---

bit_stamps

انا هبري سن القلم
اديني براية
داوي الألم يا قلم
وارسملي ضحكاية
الله عليك يا سلام
تديني استيكة
امسح بشاير يأس
دقي يا مزيكا
***
الليلة ليلة فرح
تتجمع العرسان
يتلم قلب انجرح
علي قلب كان ولهان
تنشف دموع الاسي
والحق يوم يرجع
ماضي قديم يتنسي
احكي لمين يسمع
***
انا هبري سن القلم
اخزق عيون ابليس
قولي ...معاك مسطرة ؟
اوزن كلام وهقيس
يا صاحبي في المدرسة
شوفلي معاك برجل
ارسم دواير نور
خلي الهموم ترحل
***
انا هبري سن القلم
وأجيب كمان منقلة
اظبط سرايا العلم
من ادفو للمنزلة
يا مثلث الاحلام
ارسم تلات اضلاع
ضلعين وفاء وامل
تالت يشيل لاوجاع
***
انا هبري سن القلم
لما القلم يخلص
وأقول واعيد تاني
لما الورق ينقص
يا صبح يلي جاي
هات الاماني معاك
قرب تعالي بقي
وكفاية جري وراك

لِ الشريف