حواري القدس .. قصيدة للشاعر : عمر الصاوي
مسحـراتي جاي في أول سنه
ماشي في حواري القاهره باناديك
وقلبي طاير في حواري الضفه
بجناحه بينقَّر على الشبابيك
شفت النجوم العاليه فوق الحواري
فارده شعاعها زي عرف الديك
ـ الله يجازي الليل إذا نساني ـ
بتقوللي شوف القدس فين واقفه
فاتحه بيبانها للنسيم مش خايفه
وأدانها عاوز يرتفع من تاني
فوق البيوت الصابْره والطيبه
انظر بقلبك تلتقيها قريبه
أقرب من التمره لإيد الجاني
.
ـ الله يجازي زماني كل الخير ـ
نازل بيشرب من دموعي الطير
وولاد ولادي فى الحواري الضَّلْمه
بِيزَقّلوا بالطوب على الظَّلَمَه
والنور بيتسحّب من المصباح
.
يا نخل ليه على كتفي بتميِّل
حُبَّك بيتقل؟
ولاّ جسمي قُليِّل؟
الليل مليِّل. والحجر بجناح
فتحت باب القلب بالمفتاح
يا ولاد ولادي نوّروا الفوانيس
وفي قلبي دُوْروا وقولوا يا وَحَوي
يا دنيا من غير عدل إيه تسوِي؟
.
كل البيبان ممنوع عليها اللمس
وانا قلبي ماشي في حواري القدس
ممنوع من المناديه والوقفه
ممنوع من اللهفه
حتى القمر ممنوع من التجوال
.
دوّر معايا يا ليل
إبنى الصغير من يومين غايب
أسمر جميل الوجه والحاجب
ألْدغ بيقرا صفحة الواجب
وصوابعه تتحيّر مع الطباشيره
وكل حاجه ..عينيه شافتها كبيره
إلا العساكر فى شوارع (غزة)!!
.
ضرب الجرس نزلوا الولاد في الحوش
زي البروجي وانتباه الجيوش
.
وفي الزحام
سمعته ماشي يغني أغنيه:
.
فـي حصــة القوميـه
بـاكتـب علــى إيديـا
بـاحب السمسميـــــه
وبـاكــره إسـرائيـــل
.
وفي حصة الألعـاب
باكتب علـى الكتـاب
أنـا مـن حيفـا ويـافـا
والقــدس والجليــــل
.
أمى حكت لى يامــا
عـن صيـاد اليمامــه
اللـي كسَر جناحـهـا
ورماها على النجيل
.
وفى زحمة الهتــاف
صوته اختفى عن عينيا
يمكن نسي بقية الأغنيه!!
قوم فكّره يا ليل
.
بالطبلـه دقـــه وبقلبى دقــه
ياللي سامعني ما تقولش لأ
.
أوصيـك يا إبنـي لمـا تقعــد تـذاكــر
داري صوابعك عن عيون العساكـر
حيكسّروهـا عشــان بترســــم ورده
وشمس خضرا في الصباح الباكـــر
اصحى يا نـايـم
رمضان كريــم
ليست هناك تعليقات:
إرسال تعليق