سيد درويش من ديوان عمر الصاوي

سيد درويش 

.
مسحراتي ماشي في السكه 
وقلبي بيخرّم لكوم الدكه 
رايح لبيت سيد أبو الدراويش 
على القِزاز والشيش وصوت الضحكه
.
لقيته قاعد قايد المنقد..
والورد بيفتّح له ع المسند
وفي إيده عوده
اللي ضحّك وبكّى
.
رجع الحبيب سالمه يا سلامه
.
ما هيش آهات يا عم وغناوي
دي مَيه بتشقشق معاها التقاوي
إملا القلل يا عم يا قناوي
شيخ العرب فى حيكم عطشان
.
ومصر قايمه الصبح تتشمّر
على بال عجينها فى الماجور ما يخمّر
والفرن يحمى والوابور يتعمّر
عينيها تسهر تسمع الألحان
.
يا غنوه مصريه فى قلوبنا تعيش
الموج يغنيها على الكورنيش
وتسهّر الدنيا لحد الآن
.
يا وتر أنينه هزّ كل الوجود
الثوره بتغني معاك ع العود
ضمينا على بعض القلوب والأيادي
نقول بلادي بلادي…
.
بالطبله دقه وبقلبي دقه
ياللي سامعني ما تقولش لأ
.
يا عـود بلدنـا يـا ربـاب الشجــن
قلبـك منَبِّـه مصـر عمره ما ركن
مظبوط على دقات هدير المكن
شيخ العـرب سيد أبو الدراويش
هوّ اللي روحه للحبايب سكــن
.
اصحى يا نايم
رمضان كريـــم
.
(من ديوان المسحراتي 1987)