ماهي اهم العادات التي تنصح بها؟

 

ماهي اهم العادات التي تنصح بها؟

 

1. صلى فى المسجد .. وحاول تختار مسجد بعيد عن منطقتك مافيش حد يعرفك فيه .. هايزيد من خشوعك

2. حاول تصلى الفجر لمدة 40 يوم متواصل بدون انقطاع .. واذا حصل انقطاع ابدأ من اول وجديد ..

3. اشترى سماعات أذن (هاندفرى ) وشغل قرآن على طول فى اذنك وانت خارج أو مسافر ..لصوت انت بتحبه وتدبر.

4. حاول تبدأ فى حفظ القرآن .. ويفضل مع معلم قرآن او حد تجويده كويس ..هايفرق معاك جدا

5. صلى قيام الليل ولو ركعتين بالقرآن اللى حفظته .. واجتهد ان مافيش حد يشوفك وانت بين ايد ربنا

6. فرج هم عن محتاج .. بفلوس أو تساعده فى تخليص ورق - أو تقف معاه فى ظروف معينة ..

7. عبادة السر .. حاول تعمل حاجه بينك وبين ربنا ماحدش يعرفها غيرك لحد يوم القيامة .. حتى لو هاتبيع موبايلك وتشترى علاج لانسان هايموت من الآلم .. اوتكفل يتيم من غير ما تنزل بوست عنه على الفيس بوك .

8. اعمل صلة ارحام ..واتكلم معاهم واسمع زكرياتهم عنك وعن اهل بيتك .. واشرب معاهم شاى حتى لو مش بتحبه

9. اعمل زيارة للمقابر .. وفكر قلبك انه فى يوم من الايام هاتسكن هنا لوحدك ..وماتمسكش دموعك

10. اذكر ربنا كتير اووى ..استغفره من غير ماحد ياخد باله منك .. وحاول تحافظ على مظهرك الطيب ورائحتك الطيبة

11. ارضى ابوك وامك وريح قلبهم ..اياك تخسر نصيبك من دعائهم .. هايفتحولك ابواب كتيرة مغلقة ..

12. ابعد عن اصدقائك اللى فى يوم من الايام علموك حاجه سيئة .. او وانت معاهم بتحس ان مافيش جديد فى حياتك وديمااا بيحبطوك .. اعمل اى حجة وماتخافش على زعلهم .. الله -عز وجل- ثم مستقبلك أهم بكتير

13. دور على الملتزمين وخالطهم .. حتى لو كانو مختلفين معاك سياسياً او فكرياً .. وماتشغلش بالك بنواياه كلمة ( اتقى الله ) منهم او تعالى نصلى مع بعض .. كفاية عليك تخليك مصاحبهم ..

14. اسمع خطب كتير ودروس دينيه او ابتهالات وانت قاعد على اليوتيوب .. ممكن كلمة او حديث ترقق قلبك ..

15. اعمل ميزانية وصمم مكتبه فى بيتك .. وكل شهر اشترى كتاب واقرائه واستخرج منه معانى جميلة وانشرها ..

16. ارضى زوجتك واولادك وقرب منهم .. فرح قلبها ولو بوردة .. دخل السرور على اهل بيتك ولو بابتسامة ..

17. شكل الفيس بوك بتاعك .. احذف اى صفحة مش هادفة او صديق ليل ونهار مهتم باخبار الفن وبينشر تفاهات وخلى صورة الاكاونت هادفة تاخد بها حسنات ومنشوراتك مفيدة وفيها تذكرة بمعلومة مفيدة .. وبلاش تتعب الناس بصور رحالاتك وسفرياتك واكلاتك اليومية ..

18. أعمل جمعية مع اصحابك ..وجمع فلوس العمرة .. وحاول تروح تزور النبى صل الله عليه وسلم واقف قدام الكعبة واشكى همك وحزنك لله ..

19. حقق نجاح فى دراستك ومزاكرتك ..او تقدم فى وظيفتك وعملك ..خليك قائد واصنع فارق ووزع خبراتك وسعادتك على الجميع ..خد كورسات وطور نفسك

20. اياك تنسى اصحاب الفضل عليك .. قرب منهم واشكرهم وفرحهم بتغييرك للاحسن واطلب دعائهم ليك وماتنساش تدعى لنفسك كتير جداااا .. وتلح على ربنا فى دعائك