خطوات ونصايح عشان تقدر تحوّش فلوس
تقرر تدخل تشتري حاجة معينة من السوبرماركت، تلاقيك دفعت 300 جنيه وخرجت.. أبسط الحاجات الأساسية من أكل وشرب ومواصلات بتلاقيك دافع فيهم مرتبك كله وفوق مرتبك كمان.. المرتب دايما بيخلص قبل آخر الشهر، فبتضطر تستلف، فأول ما تاخد مرتبك تسدد الديون اللي عليك، وهكذا بقا دوامة مش بتخلص.. الأسعار غالية.. المواصلات والبنزين بيحرقوا الفلوس.. والوضع الاقتصادي صعب علينا كلنا.
فاحنا هنحاول معاك نلاقي شوية حلول أو نصايح تخلينا نقدر نحوش الفلوس ونبقى عارفين فلوسنا بتتصرف في ايه ونبقى قادرين نشيل قرشين ينفعونا في الأوقات الغدارة.
دي مجموعة من الخطوات اللي قدمها موقع BankOfAmerica و N26 علشان تقدر تحوش أو توفر فلوسك:
سجل مصروفاتك: اكتب كل يوم انت صرفت إيه ودفعت كام.. من أقل حاجة لأكبر حاجة.. يعني كوباية القهوة والمواصلات وكيس الشيبسي.. ده هيخليك آخر الشهر تعرف انت صرفت كام بالظبط في إيه.. وتعرف فلوسك بتروح فين وتقدر بعد كده تتحكم في مصروفاتك
حوّش من مرتبك كل شهر: حاول أول ما تقبض مرتبك تحوش منه حوالي 20% أو 30% يعني مثلا لو بتقبض 2000 جنيه حاول تحوش منهم كل شهر 400 جنيه.. وعلى قد ما المبلغ يبان بسيط وصغير بس أحسن من مفيش ومع الوقت هيبقى مبلغ تقدر تستخدمه في أي حاجة محتاجها.
حاول تقلل من نفقاتك: لو التحويش صعب، واللي جاي على قد اللي رايح.. حاول تقلل من مصروفاتك ونفقاتك الشخصية.. يعني مثلا حاول تعمل أكل في البيت بدل ما تاكل كل يوم برا.. لو الشغل قريب من البيت، حاول تنزل بدري شوية وتتمشى للشغل.. قعدة القهوة البلدي أحلى وأرخص بكتير من قعدة الكافيه.. الفطار على عربية الفول والطعمية بيشبع زي الساندوتش أبو 100 جنيه.. القهوة اللي ممكن تشربها بـ 40 جنيه هتلاقي زيها بـ 10 جنيه.. وخلي ده اللايف ستايل بتاعك طالما مش قادر أو عارف تحوش.
حدد أولوياتك: اعرف انت عايز تعمل إيه بالفلوس اللي عايز تحوشها.. لما يبقى عندك هدف وأولويات هيساعدك أكتر لما تيجي تحوش.. يعني لو عايز تحوش عشان تجيب لبس أو تشتري موبايل أو عربية أو تشترك في كورس أو أي حاجة تانية.
استخدم الفيزا للطواريء: شعور انك بتدفع بالفيزا بيشيل من شعورنا بالذنب لأننا بنحس إننا مدفعناش فلوس.. عكس شعورنا لما بنصرف فلوس ورقية.. فعشان كدا حاول يبقى معاك فلوس كاش وتستخدم الفيزا وقت الطواريء بس.
حدد لنفسك حد أقصى للمصاريف كل يوم: يعني مثلا قرر إنك مش هتحتاج تصرف أكتر من المبلغ ده كل يوم.. وحاول فعلا متصرفش أكتر منه.. وده بعد ما تحسب مواصلاتك وأكلك وشربك وتعرف انت بتحتاج كام كل يوم.
إلغي أي اشتراك انت مش محتاجه أو بتستخدمه: لو مشترك في أي منصة من المنصات اللي عليها أفلام ومسلسلات وبرامج.. شوف انت فعلا بتستخدم منهم إيه ومبتستخدمش إيه.. ونفس الكلام مع أي أبلكيشن أو برنامج أو منصة بفلوس.. إلغي اشتراكك فورا من أي حاجة منهم مش بتستخدمها.
عيد استخدام الحاجة أو صلحها: لو أي حاجة عندك باظت أو اتقطعت، وممكن تتصلح أو تتظبط حاول تعمل ده بدل ما تشتري حاجة جديدة.. إلا لو الحاجة مش هينفع تتصلح ومضطر تشتريها جديدة.
بيع الحاجات المستعملة اللي انت مش محتاجها: فيه منصات وأبلكيشنز كتير ممكن تبيع من خلالها حاجتك المستعملة، وطالما انت كده كده مش محتاجها خلاص، حاول تبيعها.
ونصيحة أخيرة بس مش لكل الناس: لو تقدر أو تعرف تزود مصدر دخلك بشغل تاني، إعمل كده بدل ما تقلل نفقاتك.. لو عندك القدرة أو الوقت إنك تشتغل وظيفة تانية أو تشتغل “فري لانس” في الحاجة اللي انت بتعرف تعملها في أكتر من مكان، ده هيغنيك عن تقليل نفقاتك، وهيبقى بيزود مصدر دخلك وتقدر تدخر وتحوش فلوس بشكل أسهل وعملي أكتر.
وفي النهاية كل النصايح والخطوات والحلول دي تعتبر محايلات على عقلنا الباطن علشان نقدر نغير من منظورنا للأمور، ونحاول نحسن من عاداتنا الاستهلاكية، وبالتالي نزود من إدراكنا للظروف اللي حوالينا، ونحاول نتأقلم معاها.
ليست هناك تعليقات:
إرسال تعليق