لعبة الكوتشينة

 

الكوتشينة لعبة جوكر.. ممكن يتلعب بيها كذا نوع من الألعاب و تنفع في أي مكان سواء في خروجة أو سفرية أو حتى وإنت قاعد في البيت مع أهلك أو صحابك.

من أشهر الألعاب في الكوتشينة وقوانينها:

1- الباصرة أو “العادية”

بيتحط فيها 4 أوراق على الأرض ويتوزع 4 لكل واحد من اللي بيلعبوا.. واللي بيوزع الورق بيلعب في الأخر وحد تاني بيبدأ اللعب..
– لو في ورقة على الأرض ومعاك ورقة بنفس القيمة بتاخدها
– لو ورقة نزلت وبقى كذا ورقة مجموعهم بورقة من معاك بتاخدهم
– ورقة الـ 7 الكومي أقوى ورقة لأنها ممكن تاخد بيها باصرة لو في ورقة واحدة على الأرض وممكن تقش بيها كل الورق اللي على الأرض
– ورق الولد طبعًا كلنا عارفينها وبتقش أي ورق على الأرض
– الباصرة بتجمع 10 نقط.. عبارة عن إن لو معاك الـ 7 الكومي وفي ورق على الأرض قيمته لحد 10 بتاخد باصرة بيها

وفي النهاية عشان نحسب الاسكور بتاع اللاعيبة بنعد الورق واللي معاه أكتر عدد ورق بيكسب وياخد 30 نقطة وبنجمع معاهم الباصرات اللي خدناها.

2- الشايب

طبعًا أكتر لعبة حماسية ومحرجة وفيها عقابات وأحكام. 

– بتستخدم الورق كله معادا 3 أنواع شايب وبتسيب واحد بس
– لازم أكتر من 3 لاعيبة ويفضل من 4 وإنت طالع عشان تكون حماسية
–  قبل ما تبدأ لعب بتطلع أي ورقتين شبه بعض مع برا وتكمل بالباقي
– بيبدأ كل لاعب يسحب ورقة من اللاعب اللي على يمينه لو طلعت شبه ورقة معاه بيطلعهم برا
– بيفضل اللعب شغال لحد ما يتبقى شخص واحد بس معاه “الشايب” وده اللي بيكون خسران
– في النهاية بيسحب الخسران ورقة لكل لاعب عشان يحسب عدد الأحكام اللي هينفذها عليه

3- لعبة كانت ستوب أو حركة ستوب

من أمتع الألعاب اللي ممكن تلعبها عشان بتحتاج تركيز وسرعة وكمان بتعتمد على إختيار حركة صايعة مع شريكك في اللعبة..

– اللعبة ممكن تتلعب بشخصين أو أكتر ولكن أفضل طريقة تلعبها بيها هي لما يكون في 4 أشخاص وبتختلف حسب الناس والمكان
– بتبدأ اللعبة 2 ضد 2 وكل فريق بيختار علامة مميزة يعملها لما يجمع الورق
– بيتوزع 4 ورقات على الأرض و4 ورقات لكل لاعب وكل شخص بيختار كارت واحد يجمع منه الأربعة كاملين
– أول شخص بيجمع 4 ورقات شبه بعض بيعمل الحركة اللي متفق عليها مع زميله عشان يقول “كانت” وبكده يكسبوا
– أو الفريق التاني ياخد باله ويقول “ستوب” “Stop” وساعتها بيكسبوا


4- إستميشن 

تعتبر من أصعب وأمتع ألعاب الكوتشينة وبتعتمد على الحسابات والتحليل الصح لـ الورق اللي في إيدك وهتلم كام لمة “أكلة”..
– اللعبة 18 جولة وبيتوزع 13 ورقة على كل لاعب وده معناه إنهم 4 لاعيبة
– ترتيب الورق من التصاعدي بيكون 2 – 3 – 4 – 5 – 6 – 7 – 8 – 9 – 10 – A – K – Q – J
J الولد .. Q البنت – K الشايب – وأقوى حاجة A الإيس ACE
– الأقوى في نوع الورق بيكون البيج “قلب بشرطة” وبعده الهارت “قلب من غير شرطة” بعدين الكارو “شبه المُعين” وأضعف حاجة الترريفل “الشجرة”
– بتوزع الورق وتشوف حد هيطلب داش كول ولا لأ.. ولو حقق الداش الورق اللي طالبه بياخد نقطة زيادة وهنقول الحسابات بتاعتها في الآخر
– المزايدة:
1- في مزايدة عادية ودي بتكون في أول 13 جولة وبتسيب حرية للاعبين يختاروا نوع القطوع
2- مزايدة سريعة: أخر 5 جولات والقطوع بيتحدد مسبقًا وماينفعش يتغير
3- الترتيب بيكون بيج.. هارت.. كارو.. تريفل
4- بيبدأ أول لاعب بالمزايدة وتتنقل من لاعب للاعب في بداية كل جولة ولو في لاعب ورقة مش حاسس إنه هيحقق حاجة بيقول “Avoid” إنه مش هيلم أو ياكل
5- اللي بيكسب بيتحدد حسب عدد اللمات ولو في اتنين متساويين بنشوف نوع القطوع
6- بعد ما واحد بيكسب بنسيب فرصة للباقي يشوفوا مين هيعمل لمات أكتر

ملاحظات:
1- لو واحد طلب صفر لمات.. بيبقى إسمه “داش”
2- ماينفعش أكتر من شخص يطلبوا داش أو داش كول
3- ماينفعش عدد اللمات المطلوبة يساوي 13 لازم يزيد أو يقل.. بيتم إجبار أخر لاعب على الاختيار
4- لو حد من اللاعيبة طلب عدد لمات بتساوي لمات اللي كسب جولة المزايدة بيتسمى “ويذ”
5- الجولة أوفر يعني عدد اللمات المطلوب أكتر من 13
الجولة أندر يعني عدد اللمات المطلوب أقل من 13
6- لو طلبت سوبر كول (8 لمات أو أكتر) بتقدر تغير القطوع على مزاجك

اللعب
– اللي بيكسب المزايدة بيرمي ورقة من نوع معين والباقي لازم يلعب ورقة من نفس النوع وأكبر ورقة في القيمة هي اللي بتكسب اللمة
– لو مش معاك نفس النوع ممكن ترمي ورقة قطوع واللي بتكون أقوى من أي نوع وتكسب اللمة
– لو الكل فشل في اللمة بتاعته بتتسمى “جولة صعايدة” ومابتتحسبش وبتضاعف نتيجة الجولة اللي بعدها عشان تعوضها
– ولو اتلغت تاني بتضرب الجولة اللي بعدها في 4

النقاط في حالة الفوز
– 10 نقط + عدد اللمات
– 10 نقط كمان لو كسبت الجولة لوحدك
– 10 لو كان اللاعب ريسك
– 25 لو داش كول بشرط تكون الجولة أوفر “أكتر من 13”
– 33 لو داش كول والجولة أندر “أقل من 13”
النقاط في الخسارة
– خصم عدد اللمات الزيادة أو اللي ناقصة
– خصم 10 لو كان اللاعب صاحب الكول أو كان ويذ
– 10 لو هو الوحيد الخسران في الجولة
– 10 لو كان اللاعب ريسك
– 25 لو داش كول أوفر
– 33 لو داش كول أندر

ما تنسوش تقولولنا لعبتكم المفضلة من الكوتيشنة في الكومنتات