دنيا وفيها العجب وقلوب علي كل الالوان
فيه قلب لونه دهب جواه فراغ المكان
من بره يلمع ويبرق وحقيقته مش انسان
يمكن ساعات يبهرك ويبعد. كأنه ماكان
يمكن تدمع لحظه ويمر بيك الزمان
وتعرف انه سراب مايسوى نبضه حنان
####
فيه قلب عايش معاك في البسمه والاحزان
يشاركك حتي في سكاتك وهمسة الاشجان
عمره ماقالك بحبك أوطلب تقولها كمان
وجوده في حياتك حقيقه بعيد عن الالوان
وان غاب بيفضل ذكري غيرقابله للنسيان
قلب حاضر وغايب صعب يعيده الزمان
####
وقلب بلون الظلام ما تحس معاه الامان
ياخدك يلف يدور لامعني ولا عنوان
ويوم مـ يغدر بيك يضرب لحد الهوان
مايرعي عهد وعشره ولا يحفظ اللي كان
قلب ماداق الحب ولا صدق عرفله مكان
ادعي بقلبك وقول
من القلوب الضلمه
احفظنا يا رحمن
ليست هناك تعليقات:
إرسال تعليق