قولوا الحقيقة بقلم فارس من فرسان سحر الابداع /ا. محمد عبد الجواد
قولوا الحقيقة
دى أسباب بيستغلها أصحاب النفوس الضعيفة
عمرها ما تكون مبرر لأرتكاب الجريمة العنيفة
ولا عمر دين أقرها ولا أصحاب النفوس العفيفة
عشان كده بنقول للمسئولين اللى عيونهم كفيفة
***
خلوا بالكم وسُكوا البيبان ع العدو وع الجبان
مصر دى أمننا وبنقول لكل مصرى أيا كان
مسيحى أو مسلم ، كلنا فى الهم أخوة وجيران
وفى الأتحاد قوة وعزوة .. فتعالوا نعلى البنيان
***
ياريت تفوقوا لنفسكم وبلاش المصرى عليكو يهون
كفاية عجرفة ومقاوحة .. وكفاكم بقى كلام مدهون
صدقونى خطبكم الرنانة وكدبكم بيزيد الناس جنون
قولوا للشعب الحقيقة وكفاية ضحك على الدقون
***
أنا لو شايف نور فى بلدى ولا حاسس بالأمان
ولا سامع صوتى اللى أخترته يعبر عنى فى البرلمان
ولا شايف مستقبل لولدى أو حتى الكرامة بتتصان
عمرى ماكنت أفكر لحظة أيأس أو أنى أكون جبان
***
لو بتحكمنى بأرادتى .. أقدر أقول رأئي بصوت عالى
لو قادر أعيش زى البنى أدميين ، وقادر أعيش عيالى
لو الشغل متوفر معاه الكرامة ، لو قادر أتجوز حلالى
مش ممكن أبدا ومستحيل أثور .. ولا ده بقى حالى
***
ناس معدومة ومطحونة وشايفينكم بطلهطو فى كباب
ملايين البشر حقوقهم ضايعة والمسئول عنها نصاب
وملايين غيرهم عيشتهم منكوبة ما بين الطين والهباب
العيب فيكم أنتم ، ياترى عرفتم ياسادة أيه الأسباب
***
العدو بينا سهران وأحنا غفلانين وأنتم فاتحين له البيبان
بالأستكانة ، والخوف على الكرسى ، وضعف وهوان
دا حتى قالوا فى المثل كتر الضغط يعمل للناس غليان
خدوها منى نصيحة أنا العبد الفقير لله والمطحون
قولوا للشعب الحقيقة ، كفاية ضحك على الدقون
*******
كلمة أخيرة لولاد بلدى
يأهل بلدى ياولاد مصر الطيبين
ربنا فى كتابه قال من آلاف السنين
أدخلوا مصر أن شاء الله آمنين
ورغم أنف الحاقدين والمتربصين
أن شاء الله هتفضل وليوم الدين
بقلمى
الأثنين 3 / 1 / 2011
وأنا لله وأن إليه راجعون
حسبى الله ونعم الوكيل فى كل ظالم وغاشم وخائن للبلد
وفيمن سينقلها بدون ذكر أسمى
مؤلفها وكاتبها … محمد عبد الجواد
ليست هناك تعليقات:
إرسال تعليق