علي قد عينيك ماتجيب
في لسه حاجات مابانتش
واللي بتملكه في الجيب
في الغيب زيه ماتنكرش
و احسن أو يمكن أقل
أو يمكن حتي يزيد
في حاجات دائما في الضل
مش برده وجودها أكيد
لكن ممكن لو كان تقدر حسب الأمكان
تتخيل زي زمان وتوفر صرف القرش
علي قد عينيك ما تشوف
وتدقق في التفاصيل
في حاجات وبسبب الخوف
هتشوفها ضروري طشاش
وعلشان تتحقق منها
هتقرب اكتر واكتر
وتمد ايديك تلمسها
لكن فجأة ما تلقاش لها أي وجود من أصله
كانت وهم و خيالات
دى حاجات من كتر ما نفسك
تلمسها في يوم وطولها
بتقوم من النوم تحسبها
وتقيس العرض و طولها
و علشانها خيال مش واقع
بتعيد و تزيد و تراجع
لكن فعلا مش نافع و الناس تضطر تقولها
علي هيئة مره وصيه
او حتي في شكل نصيحه
وساعات في كلام له مغزى
او معني في جمله صريحه
الشئ ده ماهوش من بختك
ولا كان لك منه نصيب
فـ إنساه بكيفك و إرادتك
قبل ما يزهق و يسبب
ليست هناك تعليقات:
إرسال تعليق