هديتى لعام جديد بقم معلم فحمه

 

هديتى لعام جديد مش عام غرقان زى اللى عدا ,,
وحياتك يا قلبى ما تزعل ولا تاخد على خاطرك ,,
دا انا بحب مصر يا قلبى والله عشان خاطرك ,,
وايه يعنى حكومة فكرها تمانين ,,
ووزراء نازلين فينا تفانين ,,
وقضاة فضايحهم ماليا الجرانين ,,
ورقاصة مبينه لحمها للعين ,,
ما دام لاقيا اللى ب يطبلوا وراها ,,
ويغنوا يا ليل يا عين ,,
وحياتك يا قلبى ما تزعل ولا تاخد على خاطرك ,,
دا انا بحب مصر يا قلبى والله عشان خاطرك ,,
وولادنا اللى ماتوا ع الحدود جرجس ومحمد وعبد الودود ,,
ذنبهم اييه يا مصر غير انهم كانوا بيحبوكى وطيبين ,,
وقبل ما ينفذوا الحكم فيهم كان الاتهام مخلصين ,,
وكانوا من الكافرين ,, صايمين و بيحضروا فطار رمضان ,,
طب حد شاف تهمه فى تاريخ الجرم فيها صايمين ,,
طب اسألوا اهل العروبه والعجم والتركمان ,,
فيه حد ف التاريخ قتل ناس مساكين ,,
وحياتك يا قلبى ما تزعل ولا تاخد على خاطرك ,,
دا انا بحب مصر يا قلبى والله عشان خاطرك ,,
وآييه يعنى منتخب اتصرف عليه ملايين وبرده ,,
فيه ناس ليه مهللين مكبرين منتفعين ,,
وكأنه سجادة صلاة بيأدوا عليها الفرض ,,
هو احنا ما عندناش اطفال نايمه ف الشارع ,,
من غير هدوم ,,
ولا من كتر البهايم بنعلف ومش داريين ,,
ان ف بلدنا علم وحقه على الملايين ,,
وحياتك يا قلبى ما تزعل ولا تاخد على خاطرك ,,
دا انا بحب مصر يا قلبى والله عشان خاطرك ,,
السرطنه ف بلدنا وصلت لحد الفول ,,
وانا اللى كنت باكله كل يوم على طول ,,
من قصر ايدى بقى غدا وعشا ,,
طب لما ولادى يتسرطنوا ويروحوا يفرح فيا عزول ,,
ادعى على الحكومة ولا أأول ملعون ابوك يا فول ,,
وحياتك يا قلبى ما تزعل ولا تاخد على خاطرك ,,
دا انا بحب مصر يا قلبى والله عشان خاطرك ,,
ويرجع تانى الوطن يئن م الألم ,,
السلطه بدل ما تمد خطاوى أدب ,, وتحضر ,,
رجعت ماسكه العصا ع الغلابه ,, الا كل ذى مقام ,,
ورجعتنا ورا يجى ميت سنه يا زمان ,,
وكأن فيه باش اغا وجبان ,,
وحياتك يا قلبى ما تزعل ولا تاخد على خاطرك ,,
دا انا بحب مصر يا قلبى والله عشان خاطرك ,,
امتى يا رب تطلع على جبينى شمس الحرية ,,
وكل سنه انتظر الائى فيكى يا مصر قضية ,,
والراجل المتهم اللى خربها يطلع برىء ,و
والبرىء منتظر ,, ورا القضبان ,,
والراجل اللى انسحل ف مظاهرة ,,
حكم عليه القاضى تلات سنين أشغال ,,
وحياتك يا قلبى ما تزعل ولا تاخد على خاطرك ,,
دا انا بحب مصر يا قلبى والله عشان خاطرك ,,
لآمتى بس انتظر وانا متربى ف الشارع ,,
ولآمتى بس انتظر ومعايا كوم لحم ,,
ولآمتى بس انتظر وانا مسكين ومزارع ,,
وكل يوم الحكومة تئولى أيوه بكره ومش جايز ,,
وتنادى عليا من البلكون اطلع يا مواطن ,,
طب هه بس انا حاسس مانيش طالع ,,
وحياتك يا قلبى ما تزعل ولا تاخد على خاطرك ,,
دا انا بحب مصر يا قلبى والله عشان خاطرك ,,
التعليم خدوا الوبا وغرقته نوه الغطاس ,,
واحنا اللى علمنا الادب لكل ذى قوة بلاش ,,
عوضنا على الله ,, ف أدب دينى ,,
ومع كل اللى ألته برده انا نيلى ,,
وشارب من ماءه ,,
ما القط طول عمره بيحب خناقة ,,
عزيزة يا مصر ,,
تحياتى ,,
معلم فحمه ,,؟؟!!