البنت صبية بهية لابسه جوز خلاخيل بقلم معلم فحمه

 

البنت صبية بهية لابسه جوز خلاخيل ..



الاسم بلدى والوصف ميت موال ..



منديل بأوية معقود على القورة ..



والخطوة قول هى خطاوى غزال ..



والبيت حجر مشغول يشبه الاهرام ..



حبيت وطبيت عاشق ليالى طوال ..


تبص بعنيك تشوف حيطان الخان ..



وف آخر الصورة تشوف مآذن بتدن ..


ييجى الف آدان ..


وازهر واقف اسد يتحدى ف السلطان ..



وبيارق تنور قبة سيدنا الولى ..


ومقام طاهر جده النبى ..



وحضرة خضرة فيها الذكر ينجلى ..



وناس توحد الرحمن ..



وحاتى مشاوى فيه من كل صنف ولون ..



ودكان اللى جنبه يبيع قشطه ورز بلبن ..



وع الفرشة ست تبيع لبان دكر ..


يجلى الزور ويمنع الزكام ..



والسبح ع السور ويا البخور اشكال والوان ..


والبنت صبية بهية تشبه النيل ..



يفيض حلاوة مع الجريان ..



الخد ده فراولة والخد ده فيروز م الخان ..



بهية كل يوم تزيد حلاوتها ..


والكل طمعان .. كل يوم ييجى الظنايا اشكال والوان ..



وهى ولا همها .. بكرة يزفوها لجدع ..



تعيش معاه ع الوجع .. ويداويها بعنيه ..



ماهى طول عمرها صبية بهية لابسة جوز خلاخيل ..


الاسم بلدى والوصف ميت موال ...




معلم فحمه ,,؟؟!!