ليه اللي منك بيجرحك؟

 

8 أسباب تخلينا ممكن نجرح الناس اللي بنحبهم و قريبين مننا

1-نوع من أذى النفس أو عقابك لنفسك:

 

لما بتتملك منك مشاعر زي عدم الاستحقاق أو انك تبقى شايف انك ماتستاهلش أي حاجة كويسة.. بتبدأ تخرب في أي حاجة جميلة في حياتك بتخرب أي مشاعر أو علاقة كويسة بتديك مشاعر حب أو أي مشاعر ايجابية

2- محاولة لحماية نفسك:

وده بيبقى أكتر في العلاقات العاطفية.. لما من جواك بتبقى حاسس بعدم أمان أو إن الطرف التاني ممكن يجرحك أو ييجي عليك.. فتعمل إنت كده كأنك “بتتغدى بيه قبل ما يتعشى بيك”.. وده بيديك ايحاء بقوة موقفك وإنك مسيطر في العلاقة

3- إشكالية الثقة والأمان:

وده معناه إن كل ما الشخص شعر بثقة وأمان في العلاقة اللي هو فيها أي كان نوعها، بيبدأ يظهر في صورته الحقيقية ويتصرف على طبيعته بدون أي تجميل، لأنه بيبقى واثق إنه هيتم تقبله من الطرف التاني مهما عمل، وده اللي بيخلي الشخص ممكن يظهر أسوأ ما فيه وأحيانًا بيكون دون قصد، بس بيبقى الهدف إنه بيظهر كل جوانب شخصيته بدون فلترة.. بالتالي ده ممكن يسبب أذى للطرف التاني

4- تجارب الطفولة:

كل شخص بيبقى عنده نمط أو مثال للعلاقات وده بيتكون جواه خلال مرحلة الطفولة ومعظم الوقت بيكوت نتاج علاقته بأمه أو أبوه أو علاقة الأبوين ببعض، ولو ارتبط عنده نمط العلاقات بالأذى أو الألم، بيكبر جواه الشعور ده بشكل لا إرادي ولما بيكون في علاقة قوية مع شخص غصب عنه بيستدعي الشعور ده ويبدأ يتصرف على أساسه

5- الشعور بالاستقلال أو الحرية:

فكرة إنك ترتبط بشخص في حد ذاتها فكرة مخيفة وبتحسسك بالتهديد وإن حريتك مقيدة، بالتالي أحيانًا ممكن تتصرف بشكل يأذي الطرف التاني بسبب إن من وجهة نظرك إنت بتحمي مساحتك وحريتك اللي شايف إن فكرة الإرتباط والحميمية في العلاقة بتأثر عليها

6- بتشوف اللي قدامك آخره إيه:

في مراحل من العلاقة كلنا بنجرب نختبر الشخص اللي قدامنا، نختبر صبره وقدرة تحمله عشان نعرف هيستحمل إيه ومش هيستحمل إيه
بالذات في العلاقات اللي الحدود فيها مش بتكون واضحة كفاية، والطريقة دي عادة بيستخدمها الأطفال وهم بيختبروا الحدود اللي الأهل بيحطوها وبيجربوا يكسروها عشان يشوفوا هيحصل إيه
وعادة اللي بيستخدم الطريقة دي بيكون تعرض لخيبات أمل أثرت على ثقته في الناس وفي العلاقات

7- المثالية والتوقعات العالية:

الحقيقة السبب ده مش متعلق بالشخص اللي بيسبب الأذى، لكنه متعلق بالشخص اللي شعر بالأذى، أحيانًا التعلق الزيادة والأفكار المثالية عن العلاقة وعن الشخص بيعلي التوقعات منه بشكل يفوق طاقته وقدراته، بالتالي أي شيء أقل من التوقعات العالية دي الشخص بيعتبره أذى مع إنه ممكن مايكونش كده في الحقيقة

8- لأنه الشخص الموجود حوالينا:

على قد ما يبدو سبب بديهي ومضحك، بس هو سبب حقيقي
أوقات كتير لما بتكون حالتنا النفسية مش في أحسن حالاتها أو بنتعرض لضغط أو توتر، ده بينعكس بشكل تلقائي على أكتر شخص بنقضي وقت معاه وبيتواجد معانا لفترة طويلة بغض النظر عن كونه جزء من الضغط أو القلق اللي بنمر بيه أو لأ

الأسباب دي كلنا اتعرضنا وبنتعرض وهنتعرض ليها في علاقاتنا بالناس اللي بنحبهم في مرحلة من مراحل حياتنا، بس المهم سواء كنت الشخص اللي بيسبب الأذى أو الشخص اللي الناس بتيجي عليه، إنك تتكلم وتشرح للطرف التاني اللي إنت حاسس بيه لأن وجود لغة حوار هو اللي هيحمي كل طرف وهيحمي العلاقة نفسها!